Leikurinn fór rólega af stað og það var í raun rólegt yfirbragð yfir honum allan tímann. Það var alveg klárt að hvorugt lið ætlaði að gefa færi á sér í byrjun en Blikarnir voru að skapa sér aðeins meira framan af. Það þurfti mistök til að brjóta ísinn, Blikar fá víti uppúr því og koma sér í þægilega stöðu með því að skora. Blikar voru mun meira með boltann í seinni hálfleik og Grindavík ekki að skapa sér neitt af viti fram á við. En tilfinningin var að sigurinn var ekki endanlega í höfn fyrr en annað markið kom í kringum 70. mínútu.

Mistök Viviane í aðdraganda vítaspyrnudómsins. Blikar vissu að þær þyrftu að skora ef þær ættu að eiga séns á titlinum en voru ekki búnar að fá mörg opin færi fram að vítaspyrnunni. Markið úr vítinu létti óneitanlega á þeim.

Blikar voru Íslandsmeistarar í u.þ.b. 40 mínútur, eða á meðan þær voru yfir gegn Grindavík og Þór/KA höfðu ekki náð að koma marki á FH. En svo fór að Þór/KA kláraði sinn leik og tryggðu sér þar með Íslandsmeistaratitilinn eftirsótta. Þar með endaði Breiðablik í 2. sæti deildarinnar annað árið í röð. Grindavík endar sitt tímabil í annað hvort 7. eða 8. sæti deildarinnar en það kemur í ljós þegar úrslitin í leik Vals og KR liggja fyrir annað kvöld.

Viviane í marki Grindavíkur hefur verið frábær fyrir þær síðan hún kom til þeirra í félagaskiptaglugganum í júlí. Því miður gerði hún afrdrifarík mistök í leiknum í dag þegar fyrsta snerting hennar sveik hana eftir sendingu frá varnarmanni. Þessi slæma snerting varð svo í raun til þess að þær fengu dæmt á sig víti sem Blikarnir skoruðu fyrsta markið sitt úr. Þær voru þar með búnar að brjóta ísinn og gátu spilað mun afslappaðari það sem eftir lifði leiks.

Vel dæmt hjá Guðmundi og félögum. Vítaspyrnudómurinn hárréttur en svo var ekki mikið um vafamál.