Eins og leikurinn þróaðist þá er það ótrúlegt að Leiknisliðið hafi ekki skorað fleiri mörk úr þeim leikstöðum sem þeir sköpuðu sér. Klaufagangur í teig Selfyssinga og óðagot gerði Selfyssingum lífið auðveldara og niðurstaðan því jafntefli.

Þetta var leikur sem var yfirfullur af alls kyns atvikum. Ekkert þeirra stendur uppúr sem atvikið sem allir eru að ræða um.

Úrslitin þýða að bæði lið stöðva vissa blæðingu eftir töp í síðustu umferð. Selfyssingar halda Leiknismönnum fyrir neðan sig í töflunni.

Tómas Óli Garðarsson - var ekki í gírnum í dag, þrátt fyrir að reyna. Kom fátt frá honum sem vert er að nefna í dag og var tekinn útaf í hálfleik.
Ivan Gutierrez virtist ekki vera mættur til leiks til að spila knattspyrnu. Virtist meira umhugað um að atast í leikmönnum heimamanna með alls kyns leiðindum. Kannski var það veðrið.

Aðalbjörn virtist ekki ráða við verkefnið. Honum til varnar var þetta gríðarlega erfiður leikur að dæma en það voru í það minnsta tvö stór atriði sem virtust fara framhjá honum í dag. Annað þeirra var möguleg vítaspyrna á Selfyssinga.