Jafnteflið var sanngjarnt í þessum tíðindalitla leik en jöfnunarmark Caroline í seinni hálfleik hefði átt að hleypa lífi í ÍBV en gerði það einungis í stuttan tíma. Vörslur Viviane í marki Grindvíkinga vógu þungt þegar maður hugsar til baka og björguðu þessu stigi fyrir gestina.

Shameeka Fishley slapp í gegnum vörn Grindavíkur í síðari hálfleik en Viviane varði boltann í stöng og þaðan rúllaði boltinn eftir línunni en fór síðan aftur fyrir endalínu. Þetta hefði verið markið sem ÍBV þurfti til þess að sigla heim þremur stigum.

ÍBV er enn langt á eftir efstu liðum og eflaust ekki sáttar með uppskeruna það sem af er sumri. Grindvíkingar geta vel við unað eftir lélega byrjun á tímabilinu en Rio Hardy hefur komið með mörk inn í þetta lið og hjálpað liðinu mikið.

Cloé Lacasse átti ekki góðan dag í liði ÍBV en hún fór síðan meidd af velli eftir 52 mínútur. Cloé oft verið betri og virðist jafnvel hafa verið að glíma við meiðsli frá upphafi leiks. Skapaði þó einhverja hættu inni í teig gestanna en það var ekki nóg, Cloé er leikmaður sem tekur oft leikina í sína hendur og söknuðu Eyjakonur hennar í dag. Veðurguðirnir áttu einnig slakan dag í Eyjum en rigningin var mikil og hafði áhrif á leikinn undir lokin þar sem treyjurnar voru orðnar þungar og lítill hraði og litlar hraðabreytingar í leik liðanna.

Helgi Ólafsson var með góða stjórn á leiknum og mjög fáar ákvarðanir sem maður setti spurningarmerki við.