Komið sælir lesendur!

Heil umferð fer fram í Pepsi-deild karla í dag og að sjálfsögðu verður Fótbolti.net á öllum völlum að fylgjast með gangi mála. Undirritaður mun segja frá helstu atburðum í leik Fram og Breiðabliks sem fram fer á Gervigrasinu í Laugardal.

Aðstæður eru eins og best verður á kosið. Verið er að vökva gervigrasið og það er nánast logn og glampandi sólskyn.

Rjúkandi heitar leiksýrslur voru að koma til okkar beint úr prentaranum. Bæði lið gera tvær breytingar á sínum liðum.

Hjá Fram byrja þeir Haukur Baldvinsson og Aron Þórður Albertsson á kostnað Ingibergs Ólafs Jónssonar og Orra Gunnarssonar. Blikarnir Guðjón Pétur Lýðsson og Tómas Óli Garðarsson eru svo báðir á bekknum eftir að hafa byrjað síðasta leik. Jordan Halsman og Páll Olgeir Þorsteinsson byrja í þeirra stað.

Þetta er leikur í 5. umferð Pepsi-deildarinnar en hvorugt þessara liða hefur riðið feitum hesti frá fyrri umferðum. Framarar hafa þó sótt stig í báðum sínum heimaleikjum hingað til. Í fyrstu umferð gerðu þeir jafntefli við ÍBV en lögðu svo Þórsara í þriðju umferð.

Blikar eru hins vegar án sigurs. Jafntefli gegn FH í upphafsumferðinni og Fjölni í þeirri síðustu eru einu stig liðsins.

Fram bauð upp á markaveislu í síðasta leik er liðið sótti Hlíðarenda heim. Líklega hefðu þeir kosið að fleiri af mörkum leiksins hefðu fallið þeirra megin því eftir 90 mínútur varð niðurstaðan 5-3 sigur Valsara. Ósvald Jarl Traustason og Hafsteinn Briem buðu upp á mörk þeirra en sá síðarnefndi skoraði tvö.

Breiðablik tók á móti sprækum Fjölnismönnum og er það mat fróðari manna að þeir megi teljast lukkulegir að hafa fengið eitthvað úr þeim leik. Árni Vilhjálmsson og Davíð Kristján Ólafsson hlóðu í tvær sleggjur og sóttu þar með stig fyrir Kópavogsbúana grænklæddu.

Ef ég ætti að veðja á þennan leik og fara eingöngu eftir tölfræði síðustu ára þá myndi ég setja 1 eða X á þennan leik. Frá árinu 2009 hafa þessi lið mæst sextán sinnum og hafa bláklæddir unnið helming þeirra viðureigna og sjö leikir hafa farið jafntefli. Eini sigur Breiðabliks kom í marsmánuði þessar árs er þeir unnu 4-3 sigur í Lengjubikarnum.

Fyrri leikur þessara liða í Pepsi-deildinni í fyrra fór fram á Laugardalsvelli og skyldu liðin jöfn eftir að Jordan Halsman, sem þá lék með Fram, og Olgeir Sigurgeirsson höfðu skorað mark fyrir sitthvort liðið.

Fram gerði svo góða ferð í Kópavoginn en liðið vann 2-1 sigur. Almarr Ormarsson og Kristinn Ingi Halldórsson skoruðu mörk þeirra en mark Blika var sjálfsmark Fram.

Að auki er vert að nefna að þessi lið áttur við í Borgunarbikarnum í fyrra og fór sá leikur einnig 2-1 fyrir fram. Kristinn Ingi Halldórsson kom þeim yfir og Hólmbert Aron Friðjónsson bætti við marki úr vítaspyrnu áður en Árni Vilhjálmsson minnkaði muninn.

Geiramenn, stuðningsmannafélag Fram, er duglegt með að lauma að fróðleiksmolum tengdum félaginu. Inn á Facebook síðu þeirra má sjá þessa stöðuuppfærslu;

Vissir þú að Fram og Breiðablik hafa mæst 66 sinnum í móti eða bikarleik á vegum KSÍ frá árinu 1966?

Fram og Breiðablik skipta heldur ójafnt með sér tölfræðinni og er sem hér segir:

Fram hefur sigrað 33 sinnum gert 17 jafntefli og tapað 16 leikjum

Fram er með betri markatölu gegn Breiðablik en hún er 114-91.

Sjáumst bláklædd, glöð og með röddina að vopni á Kópavogsvelli í kvöld.

Strákarnir þurfa á þínum stuðningi að halda!

Mér finnst líklegt að Geiramenn hafi rangt fyrir sér þegar þeir segja að leikurinn fari fram á Kópavogsvelli. Hér sit ég allavegana í barnahorninu í Ármannsheimilinu og fylgist með leikmönnum Fram og Breiðabliks vera að hita upp.

Geiramenn hafa reyndar ekki fengið eitt einasta like á þennan póst þannig að það er vonandi að sem flestir hunsi hann og mæti á leikinn en ekki auðan Kópavogsvöllinn.

Liðin eru í óðaönn úti á velli að gera sig klár í leikinn sem á að hefjast eftir um það bil tuttugu mínútur. Dómarar leiksins eur líka að koma sér í gírinn en Garðar Örn Hinriksson mun dæma þennan leik. Það eru því meiri líkur en minni á að við munum sjá rautt spjald fara á loft. Honum til halds og trausts verða Ásgeir Þór Ásgeirsson og Bryngeir Valdimarsson.

Pétur Hreinsson, mbl.is
Blikar taka þetta með tveimur mörkum gegn einu. Árni Vilhjálmsson setur tvö en Jóhannes Karl maldar í móinn fyrir heimamenn.

Þór Símon Hafþórsson, 433.is
Eitt eitt jafntefli. Árni Vill skorar aftur og Jói Kalli sér um mark Fram.

Ingi Þór Sæmundsson, visir.is
Jafntefli líka. Ósvald skorar eitt og Halsman setur eitt gegn sínum gömlu félögum.

Kristján Óli Sigurðsson, Pepsi-mörkin
Blikar skora þrjú gegn einu marki heimamanna. Árni Vill skorar tvö og Elvar Páll eitt. Tryggvi Sveinn Bjarnason klórar í bakkann.

Jóhann Óli Eiðsson, Fótbolti.net
Ég ætla að treysta á tölfræðina. Tvö eitt sigur heimamanna. Ósvald skorar aftur og Hafsteinn Briem líka. Mark Blikanna verður í boði Halsman.

Tíu mínútur í leik og liðin eru byrjuð að trítla til búningsherbergja. Áhorfendur fara að ná hundraði, flestir léttklæddir ein einstka kjáni kappklæddur í von um að klæða af sér hitann. Bongóblíða í Laugardalnum í kvöld.

Liðin eru að ganga inn á völlinn á eftir ungum iðkendum. Stefán Gíslason er á bekknum hjá gestunum og var að koma sér fyrir á tréverkinu með einn rjúkandi heitan bolla af kaffi.