Komiði sæl og verði velkomin í beina textalýsingu frá viðureign Leiknis og Þróttar í 1. deild karla.

Það er stór dagur í Breiðholtinu því Leiknismenn eiga góða von á að tryggja sér sæti í efstu deild karla í fyrsta sinn í sögu félagsins. Því má búast við miklum fjölda áhorfenda, stemmningu og stuði.

Staðan er einfaldlega þessi. Leiknir er á toppi deildarinnar með 41 stig og ÍA í 2. sæti með 39 stig. Tvö efstu liðin eiga sæti í Pepsi-deildinni víst.

Þrjár umferðir eru eftir af mótinu og Víkingur Ólafsvík er í þriðja sæti með 32 stig. Leiknir er með 19 mörk í plús og Ólsararnir með 3 í plús svo ljóst er að mikið þarf að ganga á svo Leiknir fari ekki upp.

En til að það gerist í dag verða Leiknismenn að sækja sér stig eða treysta á að Víkingar vinni ekki BÍ/Bolungarvík.

Leiknismenn kunna að fagna duglega og ef þeir fara upp í kvöld má búast við einni slíkri stund. Þegar þeir unnu KR í úrslitaleik Reykjavíkurmótsins í fyrra var mikið fagnað, og svo mikið að einhverjir leikmenn fóru í Breiðholtslaug að næturlagi og héldu partýinu gangandi. Þar fundu öryggisverðir Öryggismiðstöðvarinnar svo bikarinn morguninn eftir og spurning hvort aukin gæsla verði við Breiðholtslaug í kvöld.

45 mínútur í leik og Doddi framkvæmdastjóri Leiknis spilar diskó eins og enginn sé morgundagurinn í hátalarakerfinu. Ég er vanari Elvis hérna í Breiðholtinu en Breiðhyltingar ætla að dansa í kvöld svo það verður diskó fyrir valinu.

17:25: 35 mínútur í leik og netið virkar ekki í fjölmiðlaaðstöðunni. Þjálfarateymi Leiknis, Davíð Snorri Jónasson og Freyr Alexandersson eru komnir til hjálpar og eru að senda okkur tæknimann. Hér ganga menn í öll störf.

17:30 Byrjunarliðin eru klár hér sitthvorum megin við textann en mesta athygli vekur að Sindri Björnsson, markahæsti leikmaður Leiknis sem hefur skorað 12 mörk í sumar er settur á bekkinn að þessu sinni.

Brynjar Hlöðversson snýr aftur úr leikbanni og þeir Ólafur Hrannar Kristánsson og Andri Fannar Stefánsson koma báðir inn hjá Leikni frá markalausu jafntefli við Víking Ólafsvík í síðasta leik. Kristján Páll Jónsson, Gestur Ingi Harðarson og Vigfús Arnar Jósepsson fara á bekkinn.

Karl Brynjar Björnsson snýr aftur úr leikbanni og þeir Vilhjálmur Pálmason og Aaron Lloyd Green koma inn í lið Þróttar frá 4-0 sigri á Tindastól í síðasta leik. Hreinn Ingi Örnólfsson, Björgólfur Takefusa og Ragnar Pétursson fara út.

17:56 In The Ghetto með Elvis byrjað að hljóma í Breiðholtinu og um leið ganga liðin út á völlinn. Fjörið er að byrja.