Halló halló! Hvernig hafið þið það á þessum dásamlega fimmtudegi, þar sem sólin skín og hörkuspennandi fótbolti er framundan?

Í dag gæti það ráðist hvaða lið úr 1. deild spila í Pepsi-deildinni að ári. Leiknir og ÍA eru bæði í frábærri stöðu og geta klárað verkefnið í kvöld. Tekst þeim það? Við vitum það ekki enn, en við munum vita svarið áður en kvöld er á enda!

ÍA mætir KV hér á gervigrasinu í Laugardal í kvöld. KV er í afskaplega vondum málum í næst-neðsta sæti, sex stigum frá öruggu sæti þegar einungis þrjár umferðir eru eftir. KV gæti mögulega bjargað sér á ótrúlegan hátt en þarf þá að vinna Skagamenn í kvöld.

Skaginn er hins vegar í 2. sæti deildarinnar með sjö stiga forystu á Víking Ólafsvík, og ef ÍA vinnur í kvöld er ljóst að Ólsarar geta ekki náð þeim að stigum.

Tvö scenario geta hér gerst í Laugardalnum í kvöld.

1. ÍA 100% upp og KV 99% niður.
2. ÍA tryggir sig ekki upp og KV á smá von.

Veðrið í Laugardalnum er eins og hannað fyrir fótboltaleik. Frekar lygnt og gott að mér sýnist og prýðilega hlýtt. Sumarið er núna.

Nú fer heldur betur að styttast í leik. Ekki eru áhorfendur nú margir, en leikmenn hafa skokkað inn í klefa og fá nú lokafyrirmæli frá þjálfurum.

Leikmenn eru mættir inn á með dómarann Sigurð Óla Þórleifsson í fararbroddi. KV leikur í hvítu en ÍA í gulu.