Liðin eru mætt út á völlinn og hluti Silfurskeiðarinnar tók lagið. Alvöru stuð. Enn nóg af lausum sætum þó. Talsvert færri en voru á Lengjubikarúrslitaleiknum.

Óskar Örn Hauksson er kominn heim og er meðal varamanna KR í kvöld. Frábær styrkur fyrir KR-inga að fá hann aftur.

Gaman verður að sjá Jacob Schoop á miðju KR-inga. Menn vilja meina að þar fari ansi öflugur leikmaður. Þrír Danir í byrjunarliði KR.

Byrjunarliðin eru komin inn. Stjarnan er ekki með fullan hóp en meiðsli og veikindi hafa verið að herja á Garðbæinga. Frá líklegu byrjunarliði Stjörnunnar sem við birtum í dag er enginn Þórhallur Knútsson, enginn Þorri Geir Rúnarsson, enginn Veigar Páll Gunnarsson og enginn Garðar Jóhannsson!

Palli vallarþulur er mættur í besta skapi. Hann ætlar ekki að spila Einar áttavillta í kvöld þó lagið hafi slegið í gegn í úrslitaleik Lengjubikarsins. Hér er þó lagið fyrir ykkur lesendur.

Kemstu ekki á völlinn? SportTv sýnir leikinn í beinni.

Málarameistarinn Erlendur Eiríksson dæmir leikinn í kvöld. Hann er í hörkustandi enda var hann við æfingar með úrvalsdeildardómurum á Englandi. Aðstoðardómarar eru Gunnar Sverrir Gunnarsson og Leiknir Ágústsson.

Til stóð að leikurinn færi fram á Samsung-vellinum í Garðabæ, en hann var færður í Kórinn enda skítakuldi úti.

Bæði þessi lið unnu sigra í hreinum úrslitaleikjum áður en þau hömpuðu stóru titlunum á síðasta ári. Stjarnan hafði betur gegn FH í lokaumferð Pepsi-deildarinnar í mögnuðum leik á Kaplakrikavelli. KR-ingar unnu Keflvíkinga með dramatískum hætti í úrslitaleik Borgunarbikarsins á Laugardalsvellinum.

KR-ingar hafa 5 sinnum unnið Meistarakeppni KSÍ, en Stjarnan fær tækifæri á sínum fyrsta sigri.

Rúnar Páll Sigmundsson, þjálfari Stjörnunnar:
Þetta er mjög skemmtilegur leikur og í fyrsta sinn sem við spilum svona leik. Þetta verður hörkuleikur við gott lið KR-inga. Við reynum að vera eins vel mannaðir og spila eins góðan leik og hægt er. Okkur hlakkar mikið til.

Gott og gleðilegt kvöld. Framundan er leikur Stjörnunnar og KR. Íslandsmeistararnir gegn bikarmeisturunum í árlegum leik í Meistarakeppni KSÍ. Samfélagsskjöldur okkar Íslendinga.