Sindri Björnsson fór í markið hjá Leikni. KR-ingar taka stutta aukaspyrnu og Pálmi Rafn lætur vaða, en boltinn fer rétt yfir!!

DAUÐAFÆRI HJÁ LEIKNI!!!!! KR-ingar missa boltann ömurlega og gestirnir geysast upp í skyndisókn! Kristján Páll fær frábæran bolta, geysist inn í teig og kemur sér í frábært skotfæri. Skot hans er hins vegar ekki nógu gott og fer vel yfir markið!

1522 áhorfendur á Alvogen vellinum í kvöld! Fínasta mæting!

KR-ingar vilja fá víti!! Boltanum er þrumað í Eirík Inga inni í teignum og hann virtist hafa fengið hann í höndina! Valdimar dæmir hins vegar ekki vítaspyrnu! Það er alveg pæling að þetta hafi verið hendi, hins vegar var boltanum þrumað í hann af rosalega stuttu færi. Klárt mál að hann var samt úti með höndina! Menn munu kryfja þetta til mergjar í The Pepsi Goals.

Fín sókn hjá Leikni, Sindri Björnsson rennir boltanum út á Elvar Pál sem lætur vaða en boltinn fer vel framhjá. Elvar búinn að koma ferskur inn fyrstu mínúturnar.

Nú verð ég bara að biðja Valdimar afsökunar á að hafa kallað hann Spjaldimar! Átti klárlega að spjalda Almarr þarna fyrir dýfu í teignum! Reyndi að fiska víti en sem betur fer féll dómarinn ekki fyrir því.

KR-ingar fá hornspyrnu eftir að Eyjólfur ver skot frá Almarri! Leiknismenn vildu meina að hann hefði náð að halda boltanum inni á en því var aðstoðardómarinn alls ekki sammála. Bara hreint út sagt alls ekki!

Sören Frederiksen með fáránlega snyrtilega afgreiðslu í netið, en búið að dæma rangstöðu.

Greinilegt jinx í gangi, þeir taka við sér rétt eftir að ég hef smellt færslunni inn. Flott hjá þeim!

Klárt mál að Leiknisljónin eru að vinna einvígið í stúkunni, það hefur ekkert heyrst í KR-ingum eftir hlé! Ekki einu sinni eitt lítið "áfram KR".

Svaka sókn hjá Leikni! Atli Arnarson fíflar tvo leikmenn KR upp úr skónum og kemur boltanum út á Eirík Inga. Eiríkur kemur með stórhættulegan bolta inn í teiginn en Kristján Páll rétt missir af honum og Stefán Logi grípur! Leiknismenn byrja seinni hálfleik af krafti.

BANVÆN fyrirgjöf frá Kristjáni Páli en Stefán Logi gerir vel og slær boltann í burtu!

Leikurinn er hafinn og það eru Leiknismenn sem byrja með boltann! Sólin er byrjuð að skína á KR-völlinn og vonandi verður seinni hálfleikurinn betri en sá fyrri! Áfram knattspyrna!

Leiknismenn fá tækifæri til að fara í hörku skyndisókn en Charlie Fomen kemur með heimsmet í skelfilegri skiptingu yfir á hægri kantinn! Rennur út í sandinn..

Þarna munar afar litlu!!!! Hilmar Árni fer svakalega illa með varnarmenn KR, fer upp kantinn og inn í teig og gefur frábæran bolta inn fyrir! Kristján Páll er mættur en mistekst naumlega að koma boltanum í net KR-inga, hann lekur framhjá!!

Hvað gerist þarna??? Hilmar Árni hrynur niður og heldur um andlitið eftir viðskipti sín við Óskar Örn! Það virðist nú alls ekki hafa verið neinn ásetningur í þessu, þeir skullu bara aðeins saman. Ég sá ekki að þetta væri mjög alvarlegt, Hilmar Árni er allavega staðinn upp og virðist klár í að koma strax aftur inn á!

KR-ingar hafa aðeins verið að sækja í sig veðrið undanfarið eftir dapra byrjun. Fá aðra hornspyrnu hérna eftir prýðilega sókn. Almarr kemur boltanum inn fyrir en Eyjólfur kemur boltanum í burtu. Þó ekki langt, á endanum lætur Jónas Guðni boltann fara en boltinn fer beint út á sporbaug! Þetta var roooosalega hátt yfir!

Ég var að segja við kollega mína að ég ætlaði að fara að henda einu M á Halldór Kristinn. Þá gefur hann glórulausa sendingu beint á Jónas Guðna, KR-ingar keyra í svaka skyndisókn sem endar með skoti frá Sören Frederiksen á stórhættulegum stað. Skotið fer hins vegar rétt framhjá! Þarna skall hurð nærri hælum!

Pálmi Rafn með aðra gullfallega sendingu út á kantinn, í þetta skiptið á Lalo Balbi. Hann kemur með flotta fyrirgjöf en Halldór Kristinn gerir frábærlega. Leiknismenn bomba boltanum fram á Kolbein Kárason sem er í baráttunni við Rasmus, en Daninn kemur með frábæra tæklingu og boltinn út í innkast.

Hætta við mark KR!! Hilmar með fína aukaspyrnu, Halldór Kristinn rís eins og turn í teignum og skallar boltann fyrir markið, en þar er enginn mættur til að klára! KR-ingar bjarga!

28 mínútur liðnar af leiknum og í raun ekkert dauðafæri búið að líta dagsins ljós. Leiknismenn eru að langmestu leyti að halda KR-ingum mjög vel í skefjum. Heimamenn eru ekki að finna neinar glufur og eru alls ekki hugrakkir í sínu spili. Leiknismenn geysast ekkert fram á ótal mönnum en þora samt alveg að sækja, vantar þó aðeins upp á þeirra megin líka.

Stórhætta!! Hilmar Árni með frábæra aukaspyrnu en Halldór Kristinn var ekki alveg nógu fljótur að átta sig í teignum og móttaka hans var slæm. Hann var með nóg pláss!

Pálmi Rafn með gullfallega sendingu út á kantinn á Óskar Örn, sem kemur sér í góða skotstöðu og lætur vaða. Skot hans hins vegar beint á Eyjólf!

Almarr með stórhættulega hornspyrnu en Eyjólfur gerir vel og slær boltann út.

Skúli Jón gerir klaufaleg mistök í vörninni og Leiknismenn ná boltanum! Þeir geysast fram en KR-ingar ná að bjarga. Hilmar Árni gerði samt vel, kom boltanum á Kolbein Kárason sem tók flottan snúning en varnarmenn KR fóru fyrir skot hans. Að lokum var leikmaður Leiknis dæmdur brotlegur.

Hilmar Árni vann fyrsta horn leiksins fyrir Leiknismenn. Hann tekur hornspyrnuna sjálfur og boltinn er skallaður burt, gestirnir fá innkast.

Fyrsta alvöru sókn KR og hún var hættuleg! Boltinn var heillengi inni í teig Leiknismanna, sem gekk illa að hreinsa þar til Óskar Örn átti skot rétt framhjá!

Gleðigjafinn Charlie Fomen með flotta rispu og fyrirgjöf sem virtist ætla að vera ans ihættuleg, en boltinn var aðeins of langur fyrir Kristján Pál!

Allt með frekar kyrrum kjörum í vesturbænum. Ég myndi skilgreina þetta sem hálfgert miðjumoð. En þokkalegt jafnræði í þessu, Leiknismenn meira með boltann ef eitthvað er.

Stuðningsmannasveitirnar í hörku keppni. KR-ingarnir duglegir að syngja og sömuleiðis Leiknismenn. Fín stemning hérna í Vesturbænum.

Dauðafæri hjá Leikni eftir rétt rúma mínútu!!! Banvæn fyrirgjöf inn í teiginn og Kolbeinn Kárason í hörku skallafæri, en boltinn fer rétt yfir!!! Þarna hefðu gestirnir óvænt getað tekið forystuna strax í byrjun.

Game on! Valdimar Pálsson hefur flautað leikinn á og það eru heimamenn sem byrja með boltann. Þeir sækja í átt að sovésku skeifublokkunum!