Byrjunarliðin eru klár hér sitthvorum megin við textann. Þrír af sjö nýjum leikmönnum Fram byrja í dag, Indriði Áki Þorláksson og Sigurður Gísli SNorrason sem komu frá FH og Davíð Einarsson sem kom frá Fylki. Þá eru Hrannar Einarsson og Atli Fannar Jónsson á bekknum en Ágúst Örn Arnarson og Kristján Atli Marteinsson eru ekki í hóp. Hjá Þór er maðurinn, Þórður Steinar Hreiðarsson sem kom frá Val, aftur í byrjunarliði Þórs.

Fram leikur án tveggja lykilmanna í dag þar sem þeir taka út leikbann. Það eru Alexander Aron Davorsson framherji liðsins og miðvörðurinn Magnús Már Lúðvíksson.

Pétur Pétursson þjálfari liðsins ætti þó ekki að glíma við manneklu því sjö leikmenn hafa gengið í raðir félagsins á undanförnum dögum, allir nema einn sóknarsinnaðir.

þetta eru þeir Atli Fannar Jónsson, Ágúst Örn Arnarson, Davíð Einarsson, Hrannar Einarsson, Indriði Áki Þorláksson, Kristján Atli Marteinsson og Sigurður Gísli Snorrason.

Liðin mættust í hörkuleik í 2. umferð deildarninar 16. maí síðastliðinn. Sjö mörk voru skoruð í leiknum sem lauk með 4-3 sigri Þórs og sex leikmenn fengu áminningar.

Jónas Björgvin Sigurbergsson, Gunnar Örvar Stefánsson, Reynir Már Svenisson og Gísli Páll Helgason skoruðu fyrir Þór í leiknum en Eyþór Helgi Birgisson og Ingiberg Ólafur Jónsson (2) fyrri Fram.

Komiði sæl og verið velkomin í beina textalýsingu frá viðureign Fram og Þórs sem fer fram á Framvellinum í Úlfarsárdal.

Leikurinn er í beinni sjónvarpsútsendingu á SportTV fyrir þá lesendur sem geta nýtt sér það en linkur á hana er á forsíðu Fótbolta.net.

Þór er fyrir leikinn í 6. sæti deildarinnar með 21 stig en gæti jafnað Fjarðabyggð í 3. sæti að stigum ef þeim tekst að vinna.

Heimamenn í Fram eru hinsvegar í verri málum, eru í 10. sæti með 12 stig og aðeins fjórum stigum frá fallsæti.