Guðjón Pétur á skot utan teigs yfir markið.

Valsmenn eru brjálaðir því þeir fá ekki víti og Keflvíkingar brjálaðir yfir að ekki var dæmd hendi stuttu áður.

Andri Adolphsson á lausan skalla framhjá. Mögulega síðasta tilraun leiksins.

Varamaðurinn Páll Olgeir reynir skot utan teigs sem fer langt yfir.

Markmenn liðanna hafa átt auðveldan dag.

Einar Orri sólar tvo og fer síðan niður innan teigs. Einhverjir vilja víti en það var ekkert á þetta. Þorvaldur Örlygs er ósammála mér og hlær að þessari ákvörðun.

Flæðið í leiknum hefur aðeins staðnað. Valur er meira með boltann en þeir hafa ekki skapað mikið.

Daði Bergs með fínt skot sen Beitir nær að verja vel í horn.

Óli Jó er brjálaður út í aðstoðardómarann því hann þarf að skrá niður upplýsingar um skiptingar Valsmanna og því tafðist leikurinn örlítið.

Hann öskrar að dómaranum hvort hann þurfi að kyssa leikmennina áður en þeir koma inná. Gaman að þessu.

Guðjón Pétur reynir skot utan teigs sem Beitir nær að verja.

Stuttu á undan fór Nikolaj niður og vildu Valsmenn fá vítaspyrnu. Mér fannst þetta vera víti héðan. Loksins smá beef á milli Todda og Óla en þeir eru nokkuð rólegur samt.

Eftir jafnan og frekar daufan seinni hálfleik hingað til virðast Valsmenn vera að ná tökum á leiknum, þeir hafa þó ekki skapað sér almennilegt færi ennþá.

Daði fer inn á teiginn, snýr á hægri löppina og ætlar að snúa boltanum í bláhornið. Um það bil tveir kílómetrar sem boltinn fór framhjá.

Bojan á fallega sendingu á Magnús Þóri sem er í virkilega góðri stöðu, nánast inn í markteig en fyrsta snertingin svíkur hann og Anton nær til boltans. Þarna hefði Magnús átt að gera betur og hann ræðst á gervigrasið með hnefahöggum við tilefnið, örugglega ekkert þægilegt.

Aftur er Jóhann að gera sig líklegan, nú á hann skot úr þröngu færi sem Anton nær að verja.

Skot frá Jóhanni Birni fer í varnarmenn og Keflavík fær fyrsta horn hálfleiksins.

Sigurður Egill á fyrstu tilraun seinni hálfleiks en skot hans fer beint á Beiti sem grípur vel.

Seinni hálfleikur er kominn af stað

Ég bið ekki um mikið í seinni en mig langar í mark!

Svona viljum við hafa þetta!

Óli Jó er brjálaður yfir að Axel Kári hafi ekki fengið spjald eftir brot á Andra Fannari. Haukur Páll fékk spjald fyrir nákvæmnlega það sama og ég skil gremju Óla vel. Hann þolir ekki svona dómara, það tjáði hann aðstoðarmanni sínum, Sigurbirni Hreiðarssyni, augljóslega.

Jóhann Birnir er í fínu færi í teig Valsmanna. Hann á gott skot sem hafnar í slánni. Besta tilraun leiksins hingað til.

Guðjón Pétur rennir hornspyrnu á Daða sem reynir að snúa boltann innanfótar upp í vinkilinn fjær. Fín tilraun sem Beitir slær í horn.

Tak Valsmanna á leiknum hefur aðeins minnkað og virðist Keflavíkur liðið vera að komast meira inn í leikinn.

Vá hvað ég vona að það verði eitthvað þvílíkt dramatískt vafamál og ég fái að heyra í Óla Jó rífast við Todda Örlygs. Veit ekki hvort ég myndi þora að skrifa upp allt sem færi þeirra á milli.

Eftir undirbúning Daða fer boltinn á Guðjón Pétur sem reynir skot rétt utan teigs en það er yfir markið. Valsmenn töluvert betra liðið fyrsta tæpa hálftímann.

Fyrsta alvöru tilraun Keflvíkinga. Skyndisókn endar með skoti frá Jónasi Guðna utan teigs en það fer nokkuð vel framhjá.

Aftur góð Vals sókn. Nú á Andri Fannar fyrirgjöf á Daða sem er í góðu skallafæri en skallinn fer beint í fangið á Beiti. Þarna hefði hann átt að gera betur.

Valsmenn eru að spila skemmtilegan bolta. Þeir spila boltanum með jörðinni og ná mjög vel saman.

Valsmenn byrja betur, Sigurður Egill á aðra stórhættulega fyrirgjöf sem Keflvíkingar rétt ná að koma frá.

Falleg sókn Valsmanna endar með því að Guðjón Pétur á fyrirgjöf á Nikolaj sem á skot rétt framhjá.

Daði Bergsson gerir vel, fer framhjá þremur varnarmönnum áður en hann á skot, utan teigs sem fer rétt framhjá markinu.

Úr horninu fær Bjarni Ólafur hálf vonlaust færi og tilraun hans hittir ekki á markið.

Nokkuð róleg byrjun hérna. Mesta hættan hingað til var fyrirgjöf sem McAusland gerði mjög vel í að koma í horn áður en Valsari komst í boltann.