Brotið á Andra Rúnari! Víkingar fá víti!

Steinar Þorsteinsson í hörkufæri en Kristófer náði að verja.

Menn eru ekki að fara vel með færin! Nú voru það Skagamenn í flottu færi en skot Eggerts framhjá.

Arnþór Ingi gerir þetta lipurlega, fer framhjá hverjum varnarmanninum á fætur öðrum og átti bara eftir að rúlla boltanum í hornið en framhjá fór hann!

Davíð Örn Atlason með skot í þverslána! Mark hjá Víkingi liggur í loftinu!

Haaa!!!? Hvernig fóru Víkingar að því að skora ekki þarna! Skagamenn björguðu tvívegis á línu í sömu sókninni!

Svakalegur darraðadans í teignum hjá Víkingum sem náðu á endanum að koma knettinum frá!

Alex Freyr Hilmarsson í svakalegu færi en Árni Snær Ólafsson sýndi snör viðbrögð og varði í horn!

Seinni hálfleikur er hafinn

Víkingar heldur betur að vakna og eru líklegri núna. Hættuleg sóknarlota endaði í hornspyrnu sem ekkert varð úr.

Dofri Snorrason braut sér leið í teignum, virtist togaður niður en náði skotinu sem Árni Snær varði. Ósáttur við að Gunnar Helgason benti ekki á punktinn.

Hinn fjölhæfi Arnþór Ingi með skot fyrir utan teig sem fleytti kellingar áður en það hafnaði framhjá.

Skagamenn sækja talsvert meira hér í upphafi en eina opna færið er þetta sem kom á þriðju mínútu.

Athyglisvert er að Skagamenn eru með Garðar Gunnlaugsson á bekknum þrátt fyrir að þurfa að skora nóg af mörkum til að komast áfram í kvöld!

Milos þjálfari Víkings með tilraunastarfssemi og er að leyfa ýmsum að spreyta sig þar sem liðið er öruggt með toppsæti riðilsins. Kristófer Karl fær til að mynda tækifæri í rammanum og sóknardúettinn Gary Martin og Viktor Jónsson er á bekknum.

Skagamenn í dauðafæri!!! Leikurinn byrjar fjörluga. Eggert Kári Karlsson við markteiginn en skaut framhjá.