Komið þið sæl og verið velkomin í beina textalýsingu frá úrslitaleik Reykjavíkurmótsins. Fasteignasalinn Guðmundur Ársæll Guðmundsson flautar leikinn á klukkan 19:30 en það eru Fram og KR sem eigast við.

Fram vann Þrótt eftir vítaspyrnukeppni í undanúrslitunum en KR vann 1-0 sigur á Fylki.

Allir Bretarnir eru á sínum stað í byrjunarliði Fram en Hólmbert Aron Friðjónsson kemur inn í liðið eftir að hafa verið á bekknum í síðasta leik. Þá er Halldór Hermann Jónsson kominn í liðið eftir að hafa jafnað sig á meiðslum.

KR-ingar hafa unnið Reykjavíkurmeistaratitilinn oftast allra liða, 37 sinnum. Þetta er fjórða árið í röð sem liðið leikur til úrslita. Samkvæmt Óskari Ófeigi Jónssyni á vísir.is hafa KR og Fram ekki mæst í úrslitaleik mótsins í 15 ár.

Skúli Jón Friðgeirsson er fyrirliði KR í kvöld þar sem hvorki Bjarni Guðjónsson né Grétar Sigfinnur Sigurðarson eru með. Grétar er að skokka ásamt Þorsteini Má Ragnarssyni sem kom frá Víkingi Ólafsvík í vetur en er ekki kominn með leikheimild.

Fyrst fólk er að kasta inn spám fyrir leikinn þá ætla ég ekki að vera eftirbátur. Spái 2-1 sigri fram þar sem Steven Lennon skorar sigurmarkið. Einhver sem ætlar að veðja á móti því?

''Okkur vantar boltana ennþá'' segir Guðmundur Ársæll dómari við starfsmann KRR. Það er verið að gera allt klárt í Egilshöllinni.

Byrjunarliðin ættu að vera á þessa leið:

Ögmundur
Almarr - Kristján - Lowing - Tillen
Halldór - Hewson - Jón Gunnar
Kristinn - Ingi
Lennon

Hannes
Hróar - Skúli - Gunnar - Magnús
Baldur - Atli - Egill
Dofri - Óskar
Kjartan

Heiðursgestir leiksins heilsa leikmönnum. Tveir fræknir kappar sem gerðu garðinn frægan með þessum félögum. Um er að ræða KR-inginn Gunnar Guðmannsson og Framarann Sigurð J. Svavarsson. Þeir munu afhenda verðlaun að leik loknum.