Rúmur klukkutími í leik. Ég er ekki frá því að maður sé bara örlítið spenntur svei mér þá.

Þetta verður eitthvað!

Hér væsir ekki um okkur í fjölmiðlastúkunni, kaffið er það mikið af gamla skólanum að það væri guðlast að setja mjólk út í það. Veðrið er ágætt til fótboltaiðkunar þó það hafi nú ekkert þurft að skafa hökuna á mér upp úr gólfinu þegar ég sá að það væri vindur í Grindavík. Held reyndar að fólkið hér kalli þetta í versta falli léttan andvara, við hlustum á Grindvíkinga það einfaldlega borgar sig.

Bæði lið hafa verið þokkalega dugleg við að skora, heimamenn hafa skorað 17 mörk í 8 leikjum í deildinni á meðan gestirnir hafa skorað 13. Ég held að við séum alls ekki að vera ósanngjörn þegar við biðjum um mörk hér í dag, þau koma, get fullvissað ykkur um það, þetta er bara þannig leikur.

Markahæstu menn hjá báðum liðum eru:
Grindavík
Alexander Veigar Þórarinsson, 5 mörk

Þór
Gunnar Örvar Stefánsson, 3 mörk
Jóhann Helgi Hannesson, 3 mörk

Eða eins og segir í kvæðinu góða ,,Jóhann skorar alltaf mörk"

Rýnum aðeins í hvað getur gerst í Inkasso deildinni í dag þegar 9.umferðin klárast með þessum leik og leik Hugins og Leiknis R. sem leikinn er á Seyðisfirði.

Vinni Þór og Leiknir:
Skilja norðanliðin KA og Þór hin liðin einfaldlega eftir í súpunni, ná 6 stiga forystu á liðið í þriðja sæti, sem þá mun verða Leiknir.

Vinni Grindavík og Leiknir:
Með þessu minnka Grindvíkingar bilið til muna og mikil spenna um 2.sætið þar sem einungis þrjú stig munu skilja að liðin í öðru til fjórða sæti.

Vinni Grindavík og Huginn:
Væri að sjálfsögðu stærsti sigurinn fyrir Huginn sem munu þá jafna Fjarðarbyggð að stigum í 10-11 sæti, Grindvíkingar myndu þjarma að Þórsurum og á sama tíma slíta sig frá sætinu fyrir neðan sig.

Vinni Þór og Huginn:
Fyrir þá sem vilja hafa spennu í Inkasso deildinni væru þetta verstu mögulegu úrslitin, með þessu myndast 7 stiga gjá milli toppsætanna og þriðja sætisins. Stuðningsmenn fyrir austan munu þó sennilega hoppa hæð sína því þetta galopnar fallbaráttuna.

Jafntefli gerir mikið fyrir Þór en lítið fyrir Grindavík, þeir verða einfaldlega að saxa sem fyrst á þetta bil ætli þeir sér að vera með í baráttunni í lok móts.

Á meðan Þórs liðið hefur ekki tapað leik síðan 10.maí (þegar þeir duttu út úr bikarnum gegn Völsung) og unnið síðustu 6 leiki í deildinni, þá hefur aðeins hallað undan fæti hjá Grindavík. Eftir frábæra byrjun þá hefur þeim ekki tekist að vinna leik síðan 2.júní þegar þeir tóku Leikni í karphúsið 4-0, í kjölfarið af þeim leik fylgdu tvö töp og tvö jafntefli.

Það er eiginlega ótrúlegt hversu stór leikur þetta er, bæði lið verða hreinlega að vinna. Þessir leikir vega þungt þegar talið er upp úr pokanum í lok móts.

Báðum liðum hefur gengið virkilega vel í deildinni hingað til.

Þórsarar sitja í 2.sætinu eftir 8 leiki með 19 stig og eiga leik inni á KA menn sem tróna á toppnum með 22 stig og munu nágrannarnir því vera jafnir á toppnum með sigri gestanna hér í dag.

Grindvíkingar eru í þriðja sætinu með 14 stig eftir 8 leiki, sigur í dag er lífsnauðsynlegur fyrir þá vilji þeir ekki missa toppsætin alveg frá sér.

Já komiði nú sælir kæru lesendur.

Hér mun fara fram bein textalýsing frá leik Grindavíkur og Þórs í Inkasso deildinni(1.deild karla).