Presley hljómar, liðin komin inná og fyrirliðarnir búnir að velja sér vallarhelminga.

Selfyssingar unnu hlutkestið og sækja að Breiðholtslaug, Leiknismenn hefja leikinn.

Held að við séum með nokkuð hefðbundin byrjunarlið, Tómas Óli Garðarsson situr á bekknum hjá Leikni en hann kom frá Val í lok gluggans.

Sindri Björnsson kom sömu leið aftur heim í holtið og hann fer beint í byrjunarlið Leiknis.

Eins og má sjá hér að neðan þá eru aðstæður kvöldsins meira en dásamlegar og fullkomlega tímabært að taka rúnt í perlu Reykjavíkur sem Breiðholtið auðvitað er og horfa á alvöru fótboltaleik!

Leiknismenn koma inn í leikinn eftir tap fyrir HK í 13.umferð.

Selfyssingar gerðu jafntefli við Keflvíkinga á heimavelli á mánudagskvöldið svo að bæði lið eru sigurþyrst.

Þjálfarar liðanna, þeir Kristján Guðmundsson hjá Leikni og Gunnar Borgþórsson eru hinir ágætustu félagar.

Voru samtíða í þjálfun hjá Val en í kvöld er það hið fornkveðna sem er í hávegum haft, "enginn er annars bróðir í leik".

Muniði það elskurnar!

Dómarateymi kvöldsins er skipað þeim Valdimar Pálssyni á flautu, Steinari Berg Sævarssyni og Kristni Friðrik Hrafnssyni.

Varadómarinn er Jón Magnús Guðjónsson og í eftirliti er Gunnþór Steinar Jónasson.

Leiknismenn unnu fyrri leik liðanna á Selfossi í þriðju umferð.

Hörkuleikur sem endaði 1-0 og markið skoraði Kári Pétursson.

Leikurinn markar upphaf umferðarinnar.

Með sigri fara Leiknismenn í annað sæti deildarinnar a.m.k. tímabundið en ef Selfyssingar bera sigurorð þá lyfta þeir sér í fimmta sæti deildarinnar og með því farnir að narta í toppbaráttuna.

Góðan daginn og velkomin í beina textalýsingu úr sæluríkinu Breiðholti þar sem Leiknispiltar taka á móti eiturhressum Selfyssingum í 14.umferð Inkassodeildarinnar.