Liðin að mæta út á völl. Þetta er að byrja!

Blaðamenn í fréttamannastúkunni búnir að henda í spá.

Stefán Árni Pálsson, Vísir
FH 1-1 KR

Benedikt Grétarsson, Morgunblaðið
FH 2-0 KR

Bjarni Helgason, 433.is
FH 2-1 KR

Hér í stúkunni eru ungir stuðningsmenn FH með belgíska fánann til heiðurs Jonathan Hendrickx og Jeremy Serwy.

Gaman að sjá áhorfendur mæta snemma á völlinn. Stemningin góð á nýja pallinum hjá FH þar sem fólk hefur gætt sér á veitingum og notið tónlistaratriða.

KR-ingar verða í appelsínugulum varabúningum sínum í dag.

Friðrik Dór er mættur með gítarinn. Tekur ,,Glaðasti hundur í heimi" og fer þaðan beint í ,,Dönsum eins og hálfvitar."

KR-ingar hafa skilað skýrslu. Þeir eru með sama byrjunarlið og í 2-1 sigrinum á Þrótti í síðustu viku.

Völlurinn lítur vel út og það er fólk farið að týnast í stúkuna. Sól og smá gola. Allt til staðar fyrir fínan leik!

KR-ingar hafa ekki ennþá skilað inn sinni leikskýrslu þegar 45 mínútur eru í leik. Öll lið eiga að skila inn skýrslu þegar klukkutími er í að leikur hefjist. Við látum ykkur vita um leið og Vesturbæingar henda sér á netið og skila skýrslunni!

Atli Viðar Björnsson, leikmaður 13. umferðar, er settur á bekkinn þrátt fyrir að hafa skorað tvö mörk gegn ÍA.

Emil Pálsson snýr aftur í liðið eftir leikbann en hann tekur stöðu Atla. Emil fer á miðjuna og Steven Lennon verður einn fremstur í dag.

Pétur Viðarsson er ekki með FH en hann er farinn aftur út til Ástralíu í nám. Brynjar Ásgeir Guðmundsson kemur inn í liðið í hans stað.

Bergsveinn Ólafsson var hægri bakvörður í síðasta leik en Brynjar Ásgeir gæti einnig farið í þá stöðu í dag Bergsveinn þá í hjarta varnarinnar.

Athygli vekur að Jón Ragnar Jónsson er í hóp hjá FH en hann hafði lagt skóna á hilluna fyrr á þessu ári.

Arnar Björnsson mættur með Pepsi kassa. Afhentir Atla Viðari Björnssyni sem var leikmaður 13. umferðar. Atli skoraði þá tvö mörk gegn ÍA.

KR vann fyrri leik liðanna á þessu tímabili 1-0. Pálmi Rafn Pálmason sá um að skora eina mark leiksins þar.

KR hafði einnig betur þegar liðin mættust hér í Hafnarfirði í fyrra. KR vann leikinn í júlí í fyrra 3-1 og komst á toppinn en FH-ingar komu sterkir til baka eftir það og lönduðu Íslandsmeistaratitlinum.

Tryggvi Guðmundsson:
Þessar rimmur hafa oft verið skemmtilegar og flottar. Þetta verður stál í stál en ég hef samt miklu meiri trú á FH og heimavelli þeirra í þessum leik.

Mér finnst varnarleikur KR hafa sloppið ansi vel frá gagnrýni í sumar. Indriði, Skúli Jón og Gunnar Þór eru allir reynslumiklir og talað talsvert um það. Það er engin spurning að reynslan er til staðar en þá hefur hraðinn oft minnkað. Við sáum það til dæmis í leiknum gegn Þrótti þar sem Dion fór illa með þá með hraða sínum. FH-ingar eru með hraða í sínu liði og ég tel að þeir nýti hann til að búa til mark í kvöld.

FH stendur fyrir upphitun fyrir stuðningsmenn fyrir leik.

Dagskrá hefst klukkan 18:00 á nýja pallinum fyrir utan Kaplakrika, en fyrstu 100 sem koma fá frían skammt af frönskum frá Reykjavík Chips.

Eftir það verða svo franskarnar seldar í veitingarvagni þeirra Chips-manna. Einnig verða seldir hamborgarar fyrir leik sem og fljótandi veigar fyrir bæði börn og fullorðna.

Friðrik Dór og Pollapönk munu svo koma fólkinu í gírinn með söngvum.

Góðan daginn!

Hér verður bein textalýsing frá leik FH og KR í Pepsi-deildinni í kvöld. Þessi tvö stórveldi hafa mæst oft undanfarin ár og alltaf hefur verið hart barist.

Fyrir leikinn í kvöld er FH á toppnum með 28 stig, tveimur stigum á undan Fjölni og Stjörnunni.

KR er aftur á móti með 16 stig í 10. sæti deildarinnar.