Byrjunarliðin eru klár. Hjá Val koma þær Pála Marie og Laufey Björns inn fyrir Rebekku Sverrisdóttur og Margréti Láru sem er meidd.

Blikar gera einnig tvær breytingar. Arna Dís kemur aftur í hægri bakvörðinn eftir að hafa tekið út leikbann í síðustu umferð og Olivia Chance kemur inn á miðjuna fyrir Fjollu Shala sem meiddist illa í síðasta leik. Nú er komið í ljós að Fjolla er með slitin krossbönd og framundan því löng endurhæfing.

Mikið hefur verið rætt um tímasetningu á lokaumferðinni en að spila kl.16 á föstudegi með helgina framundan er sérstakt. Vonum þó að fólk drífi sig beint á völlinn eftir vinnu og fylgist með veislunni live.

Fótbolti.net fékk Kjartan Stefánsson, þjálfara 1. deildar meistara Hauka, til að spá fyrir um úrslit í lokaumferðinni og hann spáir Blikum sigri:

Valur 1-2 Breiðablik
Þegar þessi lið mætast má búast við góðum og skemmtilegum fótboltaleik. Það var jafntefli í síðasta leik þessara liða, Valur endar í þriðja sæti sama hvernig þessi leikur fer, Breiðablik er taplaust og á von um að taka titilinn ef Stjarnan misstígur sig.

Bæði lið unnu þægilega sigra í síðustu umferð. Blikar sendu ÍA niður í 1.deild með 2-0 sigri á heimavelli á meðan Valsarar sóttu 3 stig á Selfoss. Þar fóru leikar 3-1 en nafna mín Edvardsdóttir átti frábæran leik og var í kjölfarið valin leikmaður 17. umferðar hér á Fótbolta.net.

Góðan dag og verið hjartanlega velkomin í beina textalýsingu frá stórleik Vals og Breiðabliks í lokaumferð Pepsi-deildar kvenna.

Hér á eftir munu liðin í 2. og 3. sæti deildarinnar mætast og það eru allar líkur á að við fáum hörkuleik.

Blikar hafa ekki gefið upp titilvonir sínar og ætla sér án efa að sækja sigur í von um að topplið Stjörnunnar misstígi sig gegn FH. Valsarar geta náð Breiðablik að stigum en þurfa að vinna upp átta marka mismun til að ná 2. sætinu. Það verður að teljast afar ólíklegt að þeim takist það en þegar þessi lið mætast er alltaf spilað upp á stoltið og Valsarar munu leggja allt í sölurnar til að ljúka tímabilinu með sigri.