Byrjunarlið Noregs er komið inn. María Þórisdóttir sem er á varamannabekknum í dag er hálfíslensk. Faðir hennar er Þórir Hergeirsson sem þjálfar norska kvennalandsliðið í handbolta.

Spánn bar siguroð af Japan í dag 2-1 í upphafsleiknum á Algave-mótinu. Ísland mætir Japan á föstudaginn og Spáni á mánudaginn.

Óskar Örn Guðbrandsson, fjölmiðlafulltrúi KSÍ:
Aðstæðurnar hér í Algarve eru mjög góðar en æfingavöllur liðsins er aðeins í nokkurra mínútna göngufæri frá hótelinu og rútuferðir því í lágmarki. Gott ástand er á hópnum og allar klárar í leikinn í kvöld fyrir utan Dagnýju Brynjarsdóttur sem mun hvíla og ólíklegt er að Margrét Lára Viðarsdóttir taki þátt í leiknum.

Sigríður Lára Garðarsdóttir, leikmaður ÍBV, fær tækifærið í byrjunarliðinu.

"Mig langar að sjá hvort hún geti fyllt í skarð Dagnýjar er varðar líkamlega þáttinn og föstu leikatriðin. Hún er á svona þriggja manna sláttuvélamiðju hjá mér sem mig langar að prófa gegn jafn líkamlega sterkum andstæðingi og Noregi. Sara verður fyrir aftan en Gunnhildur færist aðeins framar og tekur hlaupin inn á teiginn sem Dagný hefur vanalega gert. Það verður gaman að sjá hvernig stelpurnar nýta þetta tækifæri," sagði Freyr Alexandersson við Fréttablaðið.

Sara Björk Gunnarsdóttir:
Þetta eru allt erfiðir leikir gegn hörkuliðum á þessu móti. Þetta er góður undirbúningur fyrir Evrópumótið. Freysi er að leggja upp ákveðið skipulag og hvernig við viljum spila. Fyrst og fremst viljum við þéttan og góðan varnarleik frá öllu liðinu. Það er eitthvað sem einkennir okkur. Svo viljum við halda boltanum. Noregur er öflugt í föstum leikatriðum, þær eru sterkar að vinna fyrsta og annan boltann. Þetta verður barátta.

A-landslið kvenna mætir Noregi í Algarve í Portúgal. Þetta er fyrsti leikurinn í Algarve mótinu sem er æfingamót sem Ísland notar til að búa sig undir lokakeppni Evrópumótsins sem fram fer í Hollandi í sumar.

Snjóþungi í Reykjavík hafði töluverð áhrif á ferðalag íslenska liðsins og missti það af tengiflugi frá Amsterdam til Portúgal. Hópurinn mætti loks til Algarve rétt eftir miðnætti á sunnudagskvöld.

Norska landsliðið er líkamlega sterkt og hættulegt í föstum leikatriðum. Leikurinn verður sýndur beint á RÚV 2.

Dagný Brynjarsdóttir verður ekki með í kvöld en hún er að stíga upp úr meiðslum.