Ejub Purisevic og Þorgrímur Þráinsson búnir að koma sér fyrir í stúkunni. Þá má fara að hefja þetta.

Valsmenn taka vel á móti fréttamönnum, það vantar ekki. Allt til alls í fréttamannastúkunni og mikið stuð.

Það er verið að vökva völlinn góða. Óli Jó er í góðu skapi, röltir um og ræðir málin við menn. Prýðilegt veður til fótbolta þó það sé nokkuð napurt.

Byrjunarliðin eru komin inn. Athygli vekur að fyrirliði FH Davíð Þór Viðarsson er á bekknum og markvörðurinn Gunnar Nielsen er með fyrirliðabandið. FH virðist vera að spila 4-3-3 í dag.

FH-ingar komust í undanúrslit Lengjubikarsins þar sem þeir töpuðu fyrir KR. Valsmenn unnu sinn riðil í keppninni en tóku ekki þátt í úrslitakeppninni þar sem þeir héldu í æfingaferð til Flórída í Bandaríkjunum.

Dómari leiksins í kvöld er Ívar Orri Kristjánsson. Aðstoðardómarar eru Gylfi Már Sigurðsson og Oddur Helgi Guðmundsson. Skiltadómari er svo Jóhann Ingi Jónsson.

Valur getur unnið Meistaraleikinn í tíunda sinn
Valsmenn eru sigursælasta lið Meistaraleiksins, hafa unnið alls níu sinnum. Þeir unnu FH-inga í vítaspyrnukeppni í fyrra.

FH-ingar hafa unnið þennan leik sex sinnum, síðast 2013. Þess má geta að 1999-2002 lá þessi keppni í dvala.

Meistarar meistaranna. Velkomin með okkur á Valsvöllinn þar sem bikarmeistararnir taka á móti Íslandsmeisturum FH í árlegum leik í Meistarakeppni KSÍ. Samfélagsskjöldur okkar Íslendinga. Leikið er á aðalvelli Vals á Hlíðarenda.

Byrjunarliðin verða tilkynnt klukkutíma fyrir leik en samkvæmt mínum upplýsingum verður Draumurinn sjálfur, Kassim Doumbia, ekki með. Hann er að glíma við meiðsli.