Game of Thrones stefið komið í gang. Það er inngöngulagið hér í Grindavík. Liðin ganga út á völlinn og það er dramatík í loftinu!

Jón Ingason er í byrjunarliði Grindvíkinga. Jón er uppalinn Eyjamaður og hóf tímabilið með ÍBV en yfirgaf liðið eftir tvær umferðir. Jón væntanlega gíraður í að gera góða hluti í dag.

Hér er verið að spila gamla og góða sjóaaraslagara sem er vel við hæfi þegar þessi leikur Grindavíkur og Vestmannaeyja er framundan! Stolt siglir fleyið mitt og fleiri góð lög.

Grindavík gerir eina breytingu frá síðasta leik. Matthías Örn Friðriksson er ekki með og Björn Berg Bryde kemur inn í liðið.

ÍBV er einnig með eina breytingu. Andri Ólafsson er ekki með og Hafsteinn Briem kemur inn í liðið eftir leikbann.

Að sjálfsögðu alvöru móttökur sem maður fær í Grindavík að vanda. Leikmenn ÍBV eru mættir í bæinn og Kristján Guðmunds búinn að taka göngutúr um völlinn.

Spjallaði við kónginn í Grindavík, Jónas formann. Hann sýndi mér teikningar af framtíðarsýn Grindvíkinga. Þess ber að geta að þetta er framtíðarsýn, hamarinn er ekki kominn á loft en menn hugsa stórt hér.

Í Grindavík. Kóngurinn Jónas ætlar að vera fyrstur á Íslandi til að byggja stúku fyrir aftan mark! Takmarkar líka rokið! #fotboltinet pic.twitter.com/HHqg6lj4Ut

— Elvar Geir Magnússon (@elvargeir) June 18, 2017

Ingólfur Sigurðsson spáir 3-1 sigri Grindavíkur:
Grindavík fer með öruggan sigur af hólmi enda sterkir á heimavelli. Eyjamenn eru með fínt lið en það mun taka KG aðeins lengri tíma að stabilísera hlutina. Alexander Veigar og Andri Rúnar munu sjá um markaskorun. Lexi mun fagna mér til heiðurs enda lærði hann öll trixin sín af mér.

Þessi lið hafa ekki mæst á Íslandsmóti síðan 2012. ÍBV vann 2-1 sigur þega liðin mættust síðast, í september 2012. Magnús Gylfason var þá þjálfari ÍBV en Guðjón Þórðarson stýrði Grindavík. Andri Ólafsson skoraði markið sem réði úrslitum úr vítaspyrnu en Andri leikur enn fyrir Eyjamenn.

Þegar KSÍ leikir milli þessara liða frá aldamótum eru skoðaðir er staðan ansi jöfn. Grindavík hefur unnið 12 leiki, ÍBV 11 og 9 hafa endað með jafntefli.

Fasteignasalinn Guðmundur Ársæll Guðmundsson heldur um flautuna hér í Grindavík í dag. Hann hefur ekki dæmt í deildinni síðan í 3. umferð þegar Almarr Ormarsson fékk tvö gul spjöld frá honum án þess að fá rautt. Birkir Sigurðarson og Þórður Arnar Árnason eru aðstoðardómarar í dag.

Grindavík er í öðru sæti og mögulegt er að liðið verði á toppnum eftir daginn. Valur mætir KA á sama tíma en Valsmenn eru með tveggja stiga forystu á Grindavík.

ÍBV er eitt af þremur liðum sem sitja í 5.-7. sæti með 10 stig. Fínasta uppskera hjá Eyjaliðinu.

Grindavík gerði 1-1 jafntefli við FH í síðustu umferð. Það fréttnæmast við þann leik er að það var logn! "Ég held ég hafi aldrei spilað í Grindavík í logni. Flaggstangirnar hreyfðust ekki. Maður vissi varla hvað átti að gera í fyrri hálfleik. Við djöfluðumst og djöfluðumst og ég var næstum búinn að æla í lokin." sagði Gunnar Þorsteinsson í viðtali við Fótbolta.net eftir leikinn.

Kristján Guðmundsson, þjálfari ÍBV:
Það er enn eitt hörkuferðalagið framundan, það mun taka meira en hálfan sólarhring að spila þennan fótboltaleik fyrir okkur. En við kvörtum ekki. Þetta verður alveg mjög erfiður leikur og við gerum okkur grein fyrir því. Andri (Rúnar Bjarnason) hefur stolið athyglinni með mörkunum sínum en það eru aðrir leikmenn þarna sem hafa spilað hrikalega vel en ekki farið enn undir kastljós fjölmiðlanna. Þeir eiga eftir að gera það, ég er alveg viss um það," segir Kristján Guðmundsson.

Góðan og gleðilegan dag og verið velkomin með Fótbolta.net til Grindavíkur þar sem sjóðheitir heimamenn taka á móti ÍBV. Eyjamenn unnu öflugan sigur gegn KR 3-1 í síðustu umferð þar sem Sindri Snær Magnússon skoraði tvívegis og var valinn leikmaður umferðarinnar.

8. umferð Pepsi hefst í dag. Það var öflugt hringborð hjá okkur í gær.https://t.co/d15fm3YUen #fotboltinet

— Fótbolti.net (@Fotboltinet) June 18, 2017