Stjarnan leikur í sérstökum Evrópubúningi í dag. Stuðningsmenn kusu um það hvaða búningur yrði notaður í Evrópukeppni.

Bjarni Benediktsson er heiðursgestur og hann heilsar upp á liðin.

Liðin stilla sér upp í liðsmyndatöku. Þetta er að byrja.

Ronan Finn, fyrirliði Shamrock, sem á 30 Evrópuleiki að baki, lék með Dundalk gegn FH í fyrra. Hann fór með Dundalk alla leið í riðlakeppni Evrópudeildarinnar.

Finn ákvað að skipta um félag í vetur og ganga í raðir Shamrock. Hann fékk gott starf með fótboltanum og það var hluti af ástæðunni fyrir því að hann skipti um lið.

Dundalk hefur valdið vonbrigðum í írsku deildinni í ár eftir Evrópuævintýrið í fyrra en liðið mætir Rosenborg í Meistaradeildinni í næsta mánuði.

Silfurskeiðin syngur í stúkunni fyrir leik og pabbi Laxdal bræðranna dansar í ,,Papa Lax" treyjunni sinni. Líf og fjör.

Luke Byrne, vinstri bakvörður Shamrock, á ekki góðar minningar frá Íslandi. HAnn var í liði Bohemians sem tapaði 5-1 gegn Þór í Evrópudeildinni 2012. Þór var þá í 1. deildinni.

Einungis má selja í sæti á Evrópuleikjum. Stjörnuvöllur tekur 1040 manns í sæti og því er ljóst að það verður uppselt í kvöld.

Shamrock tók þátt í Evrópuævintýri árið 2011 en þá komst liðið í riðlakeppni Evrópudeildarinnar. Shamrock mætti meðal annars Tottenham og komst 1-0 yfir á White Hart Lane. Lokatölur urðu 3-1.

Í Garðabæ muna menn vel eftir Evrópuævintýrinu 2014 þegar Inter kom í heimsókn. Hvað gerist í ár? Nær annað hvort liðið sem spilar hér í dag að komast áfram í stórleiki í Evrópudeildinni?

Búið að vökva völlinn og liðin mætt út í upphitun.

Ég kíkti við á Garðatorgi áðan og þar var rífandi stemning. Írarnir og Silfurskeiðin að syngjast á. Bjór fyrir fullorðna og hoppukastalar fyrir börnin. Allt gekk eins og í sögu. Hægt er að sjá það á Snapchati Fótbolta.net - fotboltinet

Fámennt ennþá í stúkunni, 45 mínútum fyrir leik, þar sem fjörið er á Garðatorgi. Síðan koma menn í skruðgöngu á völlinn.

Írsku blaðamennirnir segja mér að Trevor Clarke sé öflugasti leikmaðurinn hjá Shamrock. Spilar líklega úti vinstra megin en mögulega á miðjunni.

Ronan Finn, fyrirliði, er að fara að spila sinn 30. Evrópuleik! Hann er 29 ára gamall.

Shamrock spilar 4-2-3-1 samkvæmt vef UEFA. Þar er Stjörnunni stillt upp í 4-5-1.

Graham Burke og Gary Shaw eru markahæstir hjá Shamrock á tímabilinu. Burke ólst upp hjá Aston Villa en hann spilar framarlega á miðjunni. Shaw er framherji sem hefur alla tíð leikið á Írlandi.

Byrjunarlið Stjörnunnar er komið hér til hliðar. Haraldur Björnsson er mættur aftur í mark Stjörnunnar eftir að hafa verið frá keppni í mánuð vegna handarbrots.

Stjarnan virðist ætla að fara aftur í 4-3-3 eftir að hafa leikið 3-4-3 gegn ÍA í síðasta leik í Pepsi-deildinni.

Heiðar Ægisson og Hörður Árnason detta úr liðinu síðan í þeim leik en þeir Jóhann Laxdal og Eyjólfur Héðinsson koma inn. Eyjólfur kom inn á sem varamaður gegn ÍA eftir að hafa glímt við meiðsli en hann byrjar í dag.

Baldur Sigurðsson, fyrirliði Stjörnunnar
Evrópukeppnin er alltaf skemmtileg og gefur sumrinu smá krydd, maður kúplar sig út úr deildinni. Þessi klúbbur þekkir það vel að ganga vel í Evrópukeppni og þetta getur verið mikið ævintýri.
Við ætlum að reyna að nýta okkur þetta vel og ná góðum úrslitum á móti þessu írska liði.

Rúnar Páll Sigmundsson, þjálfari Stjörnunnar
Það er mikið tempó í þeirra leik og þeir fara svolítið geist af stað í góða hápressu og við þurfum að vera varkárir þar. Þeir beita löngum sendingum og vinna seinni boltann. Þeir setja mikinn þrýsting á andstæðingana, þannig hafa þeir spilað.

Brynjar Björn Gunnarsson, aðstoðarþjálfari Stjörnunnar, sá Shamrock vinna Drogheda United 4-1 á föstudaginn.

Shamrock er í 4. sæti í írsku úrvalsdeildinni eftir 20 umferðir en liðið er 23 stigum á eftir toppliði Cork.

Stjörnumenn hafa blásið til veislu á Mathúsi Garðabæjar fyrir leik þar sem stuðningsmenn beggja liða eru að skemmta sér saman.

100 stuðningsmenn Shamrock eru mættir til Íslands til að fara á leikinn.

Inn með boltann!
Hér ætlum við að fylgjast með leik Stjörnunnar og Shamrock Rovers frá Írlandi í 1. umferð Evrópudeildarinnar.

Stjarnan hefur farið illa úr því að missa lykilmenn í meiðsli. Við spurðum Baldur út í umræðuna um dapra breidd liðsins. #fotboltinet pic.twitter.com/xOZePIg5VL

— Fótbolti.net (@Fotboltinet) June 29, 2017