Þorvaldur Örlygsson og Óli Jó mættir saman á völlinn. Viktor Jónsson mættur að horfa á sína fyrrum félaga og einnig Eyjamaðurinn Eiður Aron Sigurbjörnsson.

Svo er enginn annar en Zoran Miljkovic einnig mættur. Hann er hér á landinu til að reyna að veiða þjálfarastarf.

Liðin er komin út á völl. Nú fer þetta að hefjast!

Vallarþulurinn er búinn að panta borð á veitingastað eftir leikinn svo hann vonast eftir því að ekki verði framlenging í kvöld.

Zoran er mættur (Staðfest) #fotboltinet pic.twitter.com/UL3zt8L3R9

— Elvar Geir Magnússon (@elvargeir) July 2, 2017

Tómas Þór Þórðarson, íþróttafréttamaðurinn geðþekki, er mættur í sumarskapi með sólgleraugu í stúkunni. Frídagur hjá Tómasi og hann nýtir hann að sjálfsögðu í að fara á völlinn og sjá sína menn í Víkingi.

Gárungarnir í stúkunni tala um að þetta sé fjórði leikur Víkinga í röð með þetta byrjunarlið. Það hefur gengið fantavel svo það hefur verið algjör óþarfi að breyta.

Það er kominn ágætis fjöldi stuðningsmanna ÍBV í stúkuna. Það var rútuferð og allur pakkinn. Liðin eru að hita upp undir taktfastri tónlist. Nokkrir áhorfendur að gæða sér á hamborgurum. Fallegur sunnudagur í Fossvogi.

Byrjunarliðin eru komin inn
Logi Ólafsson stillir upp sama byrjunarliði og vann Víking Ólafsvík 2-0. Sóknarmaðurinn Geoffrey Castillion er á bekknum en hann hefur ekkert leikið síðan hann meiddist í 3. umferð Pepsi-deildarinnar.

Kristján Guðmundsson, þjálfari ÍBV, gerir tvær breytingar á byrjunarliði sínu frá 0-1 tapi gegn FH. Kaj Leo í Bartalsstovu kemur úr leikbanni og Alvaro Montejo kemur inn. Arnór Gauti Ragnarsson og Sigurður Grétar Benónýsson fara á bekkinn.

Frá aldamótum hafa þessi lið mæst 21 sinni. ÍBV hefur fagnað 12 sigrum, Víkingar 8 og aðeins einu sinni hefur verið jafntefli.

Liðin hafa mæst í deildinni í sumar. Alvaro Montejo skoraði eina markið á Hásteinsvelli í sigri ÍBV.

Eyjamenn hafa verið sveiflukenndir en uppskeran rýr úr síðustu leikjum og þeir hafa sogast niður í fallbaráttu Pepsi-deildarinnar.

ÍBV vann Fjölni 5-0 í 16-liða úrslitum þar sem Kaj Leo í Bartalsstovu, Arnór Gauti Ragnarsso, Mikkel Maigaard, Pablo Punyed og Sigurður Grétar Benónýsson skoruðu mörkin.

Eyjamenn hafa fjórum sinnum orðið bikarmeistarar en þeir töpuðu í úrslitaleiknum gegn Val í fyrra.

Víkingur Reykjavík hefur einu sinni hampað bikarnum.

Víkingar eru á gríðarlegu flugi í Pepsi-deildinni eftir að Logi Ólafsson tók við stjórnartaumunum. Liðið hefur sótt 11 stig undir stjórn Loga og ekki tapað undir hans stjórn. Þá stýrði Logi Víkingum til sigurs gegn Ægi Þorlákshöfn í síðustu umferð bikarsins.

Góðan og gleðilegan sunnudag.

Það er komið að bikarslag Víkings R. og ÍBV í 8-liða úrslitum. Málarameistarinn Erlendur Eiríksson flautar til leiks klukkan 17:00.

FH-ingar verða í pottinum þegar dregið verður í undanúrslitin eftir sigur á Fylki í liðinnu viku. Í kvöld mætast Stjarnan og KR og þá eigast við Leiknir R. og ÍA á morgun.