Leiknismenn líklegri þessa stundina.

6 mínútur í uppbótatíma.

Leiknismenn með hættulega hornspyrnu sem endar á skoti frá Bjarka Aðalsteinssyni hátt yfir markið. Maður hefur það á tilfinningunni að ef það kemur sigurmark kemur það úr föstu leikatriði.

Spes atvik.

Ásgeir Marteinsson á harða spretti upp völlinn og kominn inn á teig Leiknsmanna þegar annar bolti kemur inn á völlinn. Dómarinn stoppar ekki leikinn og á endanum sparkar HK-ingur boltanum útaf.

"Þetta er eitthvað trikk til að stoppa leikinn" heyrist af bekk gestanna.

Leiknismenn fá hornspyrnu sem þeir nýta ekki og í beinu framhaldi komast HK-ingar í stöðuna 3 gegn tveimur varnarmönnum. Eftir tvo sénsa að gera eitthvað, fyrst frá Bjarna Gunnarssyni og svo Brynjari Jónssyni bægja Leiknismenn hættunni frá. Liðin hafa ekki verið nógu dugleg að nýta sér hröð upphlaup í kvöld.

Fáum við sigurmark í þetta?

Liðiin skiptast á að sækja án þess að skapa sér neitt að ráði.

Kristján Páll, bakvörður Leiknismanna, missir boltann á hættulegum stað, Ásgeir Marteinsson ber boltann upp og kemur honum á Brynjar Jónasson sem kemst í ágætis færi en gerir ekki nægilega vel.

HK-ingar að sækja í sig veðrið eftir að Leiknismenn hafa verið betri í seinni hálfleik.

Tvö víti?!?

Bæði lið gerðu tilkall til vítaspyrnu rétt í þessu. Fyrst vildu gestirnir víti þegar þeir vildu meina að Kristján Páll Jónsson hafi brotið á Herði Inga innan teigs, ekkert dæmt og Leiknismenn bruna upp þar sem Leiknismenn vildu meina að Hörður Ingi hafi brotið á Ingvari Ásbirni innan teigs.

Bæði lið höfðu hugsnlega eitthvað til síns máls, en ég hefði ekki boðið í bekk gestanna ef hann hefði flautað víti á seinna brotið.

Brynjar Jónasson kemst upp að endamörkum heimamanna, á sendingu fyrir sem Eyjólfur slær til hliðar en Daði Bærings rétt náði til boltans á undan Ásgeiri Marteinssyni sem er svo dæmdur brotlegur.

Ásgeir Marteinsson með aukaspyrnu af þokkalega hættulegu færi sem fer í gegnum vegginn en Eyjólfur á ekki í miklum erfiðleikum með að grípa boltann.

Eyjó var fljótur að koma boltanum í leik og minnstu munaði Kolbeinn kæmist í gegnum vörnina hinu megin.

Leiknismenn búnir að komast tvisvar á skömmum tíma upp að endamörkum HK-inga en sendingar þeirra fyrir markið ekki skilað sér á réttan stað.

Rétt í þessu var þriðja skiptið að bætast við þegar Ingvar átti sendingu við markteigshornið fyrir en beint í HK-ing.

Viktor Helgi Benediktsson virðist hafa meitt sig eftir samstuð við Brynjar Hlöðversson áðan. Viktor, sem getur að því er virðist stokkið hæð sína í lofti, vann skallaeinvígi með því að hoppa yfir Brynjar og endaði á að kollvarpast á andlitið/öxlina. Hann fékk réttilega dæmt brot á sig en hann virðist lítið geta hreyft öxlina þessa stundina.

Væri synd að sjá hann fara útaf vegna þessa en hann er líklega búinn að vera besti maður vallarins hingað til.

Fínt spil hjá Leiknismönnum sem endar á sendingu fyrir frá Ragnari en boltinn endar í öruggum höndum Arnars Freys í marki gestanna.

Leikurinn er farinn af stað.

Brynjar Jónasson með gott skot rétt fyrir utan teig sem Eyjólfur ver í hornspyrnu. Gott skot.

Ósvald Jarl gerir vel og kemur sér í færi við mark HK-inga en kýs að senda boltann fyrir markið í staðinn fyrir að skjóta. Boltinn fer í fyrsta varnarmann og í hornspyrnu sem ekkert varð úr.

Gott færi! Bryjar Jónasson fékk stungusendingu í gegn (sá ekki frá hverjum því miður) en var of lengi að athafna sig og færið rennur í sandinn. Virkilega gott færi.

Hættuleg skyndisókn hjá heimamönnum!

Eftir aukaspyruna komast Leiknismenn upp völlinn fjórir gegn þremur. Kolbeinn átti sendingu á Ragnar sem skipti honum yfir á Kristján Pál en sending Kristjáns á Tómas Óla misheppnast.

Brynjar Jónasson fer illa með Ósvald og Skúla í vörninni hjá Leikni og uppsker aukaspyrnu á hættulegum stað við horn vítateigsins. Gestirnir vildu spjald en fengu bara tiltal á Skúla sem braut af sér.

Kolbeinn Kárason með ágætis skot nokkuð fyrir utan teig en boltinn fer þónokkuð yfir. Þrátt fyrir þetta skot eru HK-ingar enn líflegri eftir markið.

Dauðafæri hjá gestunum!

HK-ingar fá aukaspyrnu á fínum stað. Leifur Andri Leifsson átti fína fyrirgjöf sem endar að lokum hjá Viktori Helga Benediktssyni sem á skot framhjá af markteig. Boltinn datt óvænt fyrir hann og það var eins og hann átti ekki von á honum.

Hefði átt að gera betur!

Tómas Óli með frábært skot!

Tómas Óli Garðarson fær boltan skoppandi rétt fyrir utan teig eftir hornspyrni en flott skot hans fer rétt yfir markið. Leiknismenn aðeins að lifna við.

Klaufalegt hjá Kolbeini!

Kolbeinn Kárason fékk allt í einu boltann frá Brynjari Hlöðverssyni og var kominn einn gegn einum varnarmanni HK. Þegar hann ætlaði að gera tilraun til að sóla varnarmanninn flæktist boltinn fyrir honum og gestirnir bægja hættunni frá. Kolli átti að gera betur þarna.

Bjarni Gunnarsson fékk boltann á miðjunni og rekur hann óáreittur upp völlinn þangað til hann gefur hann inn á teig til Ásgeirs Marteinssonar sem á skot að marki en boltinn fer í Leiknismann og útaf. Hornspyrna sem ekkert kemur úr.

Ásgeir Marteinsson fær flugbraut til að leggja boltann fyrir sig rétt fyrir utan teig en skotið fer hátt yfir. Hefði átt að gera betur þarna.

Ragnar Leósson á hornspynu frá hægri sem endar á kollinum á Skúla Sigurz en skallinn er laus og Arnar í marki gestanna á ekki í erfiðleikum að handsama knöttinn.

Lítið að gerast um þessar mundir. Hvorugt liðið að skapa sér mikið.

HK-ingar leyfa heimamönnum að spila boltanum sín á milli í vörninni. Skúli Sigurz átti slaka sendingu úr vörninni sem hafnaði hjá Bjarna Gunnarssyni sem átti skot hátt yfir.

Leiknismenn eru meira með boltann en HK-ingar eru beinskeyttir og líklegri til að skora þó að þeir hafi ekki fengið neitt sem kalla mætti færi.

Fyrsta færi leiksins hefur litið dagsins ljós. Brynjar Jónasson rekur boltann inn í teig heimamanna en skot hans fer rétt framhjá.

Leikurinn farinn af stað. HK-ingar sækja í átt að Breiðholtslauginni.