Liðin ganga hér inn á völlinn.

Það eru tveir aðrir leikir í Inkasso-deildinni í kvöld og þeir eru allir í beinum textalýsingum hér á Fótbolti.net! Fylgstu með!

Leikir kvöldsins:
19:15 Leiknir R. - HK
19:15 Haukar - Fram
19:15 Fylkir - Grótta

Djúsinn er vel blandaður í fréttamannagámnum. Það styttist í leik!

Pedro, þjálfari Fram, búinn að snoða sig. Breytir það einhverju?

Nú er rúmur stundarfjórðungur í leik. Hvet alla til þess að skella sér á völlinn.

Stebbi Gísla tekur hring með byrjunarliðinu sínu. Allir ferskir.

Pedro gerir þrjá breyingar. Sigurpáll Mellberg, fyrirliði, kemur aftur inn. Hlynur Atli Magnússon er líka í byrjunarliðinu og Kristófer Jacobson Reyes.

Sigurður Þráinn Geirsson, Arnór Daði Aðalsteinsson og Axel Freyr Harðarson fá sér sæti á varamannabekknum í kvöld.

Byrjunarlið Fram:
12. Hlynur Örn Hlöðversson (m)
4. Sigurpáll Melberg Pálsson (f)
6. Brynjar Kristmundsson
7. Guðmundur Magnússon
14. Hlynur Atli Magnússon
17. Kristófer Jacobson Reyes
20. Indriði Áki Þorláksson
21. Ivan Bubalo
24. Dino Gavric
26. Simon Smidt
32. Högni Madsen

Stefán Gíslason heldur í sama lið. Ein breyting frá því síðast. Þórhallur Kári Knútsson spilar ekki í dag vegna meiðsla, en inn í hans stað kemur Ísak Jónsson. Strákur sem er fæddur 1999. Spennandi að sjá hvernig hann stendur sig.

Byrjunarlið Hauka:
1. Terrance William Dieterich (m)
3. Sindri Scheving
5. Gunnar Gunnarsson
7. Björgvin Stefánsson
11. Arnar Aðalgeirsson
18. Daníel Snorri Guðlaugsson
19. Baldvin Sturluson
20. Ísak Jónsson
22. Aron Jóhannsson
24. Haukur Ásberg Hilmarsson
27. Alexander Freyr Sindrason (f)

Þetta er þriðji heimaleikur Hauka í röð, en það er langt síðan Haukar töpuðu síðast í Inkasso-deildinni á Ásvöllum. Þeirra eina tap á þessum velli í sumar kom gegn Pepsi-deildar liði Víkings R. í Borgunarbikar karla. Þá voru lokatölur 4-2.

Bæði þessi lið spiluðu síðasta laugardag. Haukar gerðu markalaust jafntefli gegn Þrótti R. og Fram tapaði á dramatískan hátt gegn HK á heimavelli.

Spennandi verður að sjá hvort Pedro takist að ná í sinn fyrsta sigur í kvöld. Þegar hann tók við liðinu var liðið fjórum stigum frá öðru sætinu, en það bil er aðeins stærra núna.

Pedro fékk meðmæli frá Rui Faria, aðstoðarmanni Jose Mourinho hjá Manchester United, þegar hann tók við Fram, en aðspurður út í það sagði Pedro: ,,Það skiptir engu máli, talaðu við stjórnina. Ég kann mjög vel við Rui, hann er flottur kall. Hann er einn af bestu þjálfurum heims og hefur gert góða hluti með Manchester United."

Spámaður umferðarinnar hjá Fótbolta.net er Þórður Ingason, markvörður Fjölnis. Hann spáir fyrsta sigri Pedro Hipolito hér í kvöld.

Þórður Ingason:
Portúgalski snillingurinn í Grafarholtinu tekur sinn fyrsta sigur í deildinni. Vinnslan í Bubalo skilar honum 2 mörkum.

Dómari í dag er Peter Wright, hann kemur frá Englandi.

Hann er hér á landi að taka þátt í verkefni knattspyrnusambanda Íslands og Englands um dómaraskipti. Hann er hér ásamt landa sínum, Martin Coy.

Þeir munu dæma leiki í Inkasso-deildinni sem og verða aðstoðardómarar á leik í Pepsi-deild karla. Í kvöld dæmir Peter í Inkasso-deildinni og Martin er fjórði dómari.

Á Laugardaginn mun Martin dæma leik Selfoss og Þórs í Inkasso-deildinni, en Peter verður þar fjórði dómari. Sunnudaginn 23. júlí munu Peter og Martin vera aðstoðardómarar í leik Víkings Ólafsvíkur og Vals í Pepsi-deild karla.

Fyrr í sumar ákvað Fram að taka umdeilda ákvörðun. Þeir ráku Ásmund Arnarsson og réðu í staðinn hinn óþekkta Portúgala Pedro Hipolito.

Það hefur ekki gengið vel í fyrstu leikjum Hipolito. Hann tók við 3. júlí og síðan þá hefur Fram spilað þrjá leiki. Þeir hafa allir tapast.

Fram er í áttunda sæti með 15 stig.

Það hefur vantað ákveðinn stöðugleika hjá Haukum. Þeim hefur ekki tekist að vinna tvo leiki í röð í sumar. Það hefur vantað að fylgja á eftir sigurleikjum!

Haukar eru í sjöunda sæti með 17 stig. Þeir þurfa að vinna nokkra leiki í röð ef þeir ætla að blanda sér í einhverja baráttu þarna á toppnum.

Það má búast við hörkuleik.

Þessi lið eru í sjöunda og áttunda sæti Inkasso-deildarinnar.

Í kvöld mætast eins og áður segir Haukar og Fram, en leikið er á Gaman Ferða vellinum, á gervigrasinu að Ásvöllum í Hafnarfirði. Þetta er geggjað nafn á fótboltavelli!

Inkasso-ástríðan!

Hér munum við fylgjast með leik Hauka og Fram í 12. umferð Inkasso-deildarinnar.

Ég mun segja ykkur frá öllu því helsta sem gerist í leiknum, fylgist með!