Liðin eru mætt út á völlinn. Man City í ljósbláum treyjum en Hamrarnir eru alsvartir í dag. Dómararnir eru bleikir.

Vorum að fá þau skilaboð að Þóroddur Hjaltalín, dómari leiksins, eigi 40 ára afmæli í dag! Hann fær að sjálfsögðu lúxus afmæliskveðjur frá Fótbolta.net.

How's your Icelandic, lads? pic.twitter.com/OdE9vrsuto

— West Ham United (@WestHamUtd) August 4, 2017

Ederson Moraes, nýr markvörður Manchester City, byrjar leikinn en City er með hörkuöflugt byrjunarlið. Stórstjörnur eins og Gabriel Jesus og Sergio Aguero byrja.

Í byrjunarliði West Ham eru Joe Hart markvörður og varnarmaðurinn Pablo Zabaleta sem báðir fóru frá City til West Ham í sumar.

Joe Hart er fyrstu mættur út í upphitun hér á Laugardalsvelli og fólk er byrjað að koma sér fyrir í stúkunum.

Byrjunarlið Man City: Ederson (m), Kompany (f), Stones, Otamendi, Yaya Toure, De Bruyne, Sane, Silva, Danilo, Jesus, Aguero.

Byrjunarlið West Ham: Hart (m), Zabaleta, Fonte, Ogbonna, Masuaku, Noble (f), Obiang, Fernandes, Arnautovic, Ayew, Martinez.

Verður Víkingaklappið tekið í dag? James Collins, varnarmaður West Ham, fer fögrum orðum um stuðningsmenn íslenska landsliðsins í viðtali við heimasíðu Hamranna. Hann segist vonast eftir því að Víkingaklappið verði tekið á leiknum.

Þórsarinn Þóroddur Hjaltalín flautar leikinn í dag. Aðstoðardómarar eru Jóhann Gunnar Guðmundsson og Frosti Viðar Gunnarsson. Þorvaldur Árnason er fjórði dómari.

Úði og logn. Flott fótboltaveður í Laugardal. Doddi Hjaltalín og félagar skoða völlinn. #fotboltinet pic.twitter.com/IFy4KSRXaW

— Elvar Geir Magnússon (@elvargeir) August 4, 2017

Manchester City hefur verið í góðum gír á undirbúningstímabilinu en liðið vann Real Madrid 4-1 í síðustu viku og Tottenham 3-0. Spennandi að sjá hvort liðið muni halda uppteknum hætti í dag. Manchester City mætir Brighon í fyrstu umferð ensku úrvalsdeildarinnar þarnæsta laugardag.

Pep Guardiola, stjóri Man City:
Þetta er síðasti leikurinn fyrir tímabilið. Vonandi getum við spilað eins og í síðustu tveimur leikjum. Það er best að bæta sig í leikjum og við erum að mæta öðru liði úr ensku úrvalsdeildinni. Þess vegna er þetta mikilvægur leikur fyrir okkur.

Íslenskir stuðningsmenn Manchester City voru mættir hressir og kátir fyrir hádegi á Ölver í Glæsibæ til að hita upp. Þar voru meðal annars mættir Mike Summerbee og Árni Gautur Arason. Summerbee varð Englandsmeistari með Manchester City á því herrans ári 1968.

Þetta er stutt stopp hjá liðunum hér á landi. Þau komu til landsins í gær og æfðu á Laugardalsvelli. Strax eftir leikinn í dag fljúga þau af landi brott.

Mark Noble, leikmaður West Ham:
Ég vildi alltaf koma í frí hingað. Fara í Bláa Lónið og allt það. Ég held að við höfum ekki tíma í það núna en það er frábært að koma hingað og spila. Þetta er fyrsti leikurinn á milli enskra félaga á Íslandi og það er gaman að vera hluti af sögunni.

Þetta er í fyrsta sinn sem ensk úrvalsdeildarlið leika æfingaleik rétt fyrir mót hér á Íslandi.

Tveir leikmenn Manchester City fóru í West Ham í sumar og gætu mætt sínum fyrrum félögum í þessum leik. Það eru Pablo Zabaleta og enski landsliðsmarkvörðurinn Joe Hart.

Stærsta stjarna leiksins er klárlega Sergio Aguero, sóknarmaður Manchester City og argentínska landsliðsins. Liðsfélagar hans þýski landsliðsmaðurinn Leroy Sane, Brasilíumaðurinn ungi Gabriel Jesus og stoðsendingavélin Kevin De Bruyne eru aðrir leikmenn sem geta glatt augað.

Hjá West Ham má finna Marko Arnautovic, austurríska landsliðsmanninn sem gekk í raðir West Ham frá Stoke í sumar og Chicharito, Javier Hernandez, fyrrum leikmann Manchester United sem einnig kom nýlega í West Ham.

Síðast mættust liðin í ensku úrvalsdeildinni í febrúar á þessu ári. Manchester City vann 4-0 en í þeim leik skoraði Jesus sitt fyrsta mark fyrir City.

Heil og sæl og verið velkomin með okkur í lýsingu frá umtöluðum æfingaleik Manchester City og West Ham sem fram fer á Laugardalsvelli.

Aðsóknin í dag verður langt frá þeim væntingum sem gerðar voru þegar farið var út í þessa vegferð en ræðum ekki meira um það í bili...

Þessi leikur er lokahnykkur beggja liða í undirbúningi fyrir nýtt tímabil. Enska úrvalsdeildin fer af stað eftir viku. Manchester City á fyrsta leik gegn nýliððum Brighton & Hove Albion en fyrsti leikur West Ham verður gegn Evrópumeisturum Manchester United.