Liðin ganga hér inn á völlinn. FH-ingar skarta hér alsvörtum búningum. Þetta er að skítlúkka! KA liðið er í sínum hefðbundnu gulu treyjum og bláu stuttbuxum.

Menn eru snemma í því að lesa upp liðin á Akureyrarvelli. Það er verið að klára það af hérna meðan varamenn ganga frá boltum og keilum. Ný rödd á mæknum. Brakandi spenna!

Afsakið upplýsingaleysið! Undirritaður er kominn í netsamband, en þó aðallega búinn að finna bílastæði í göngufæri við völlinn. Það er fátt í stúkunni en veður til knattspyrnuiðkunar er mjög fínt.

Síðasti leikur KA í deildinni var 23. júlí gegn Breiðabliki, en frá þeim leik gerir liðið tvær breytingar. Elfar Árni Aðalsteinsson byrjar ásamt Vedran Turkalj, sem kom til liðsins í glugganum. Ásgeir Sigurgeirsson og Davíð Rúnar Bjarnason eru teknir út úr liðinu.

Hjá FH er gerðar tvær breytingar frá tapinu gegn Maribor. Guðmundur Karl Guðmundsson kemur inn í hægri bakvörðinn fyrir Bergsvein Ólafsson. Bergsveinn er á meðal varamanna. Þá kemur reynsluboltinn Atli Viðar Björnsson inn í byrjunarliðið fyrir Atla Guðnason.

Athygli vekur að FH er aðeins með sex menn á bekknum, en það er leyfilegt að hafa sjö. Það eru 17 menn í hóp hjá FH, en á bekknum er m.a. aðstoðarþjálfarinn Ólafur Páll Snorrason.

FH fékk til sín tvo erlenda leikmenn í glugganum, Matija Dvornekovic frá Króatíu og Cédric D'Ulivo, en hvorugur þeirra er í hóp í dag.

Byrjunarliðin eru klár!

Ekki hefur verið spilað um verslunarmannahelgi í Pepsi deild karla síðan árið 2013. Þá heimsóttu einmitt FH-ingar ÍBV á Þjóðhátíð og unnu 1-2 sigur.

Það hefur aðeins dregið fyrir sólu en vonandi verður gott veður meðan á leik stendur. Bæjarhátíðin Ein með öllu er í fullu fjöri og miklar vonir eru bundnar við að gestir hennar láti sjá sig í stúkunni í dag!

Á meðan eru Hafnfirðingar í hörkuleikæfingu. Þrír leikir í Evrópu og bikar síðan síðasti deildarleikur þeirra var spilaður. Ekki sama markagleðin þó, einn sigur og tvö töp - markatalan 1-2.

KA hefur ekki spilað leik síðan 23.júlí en þá mættu þeir Breiðablik á heimavelli. Töpuðu 2-4 en vörnin hefur verið hriplek undanfarið. Markatalan í síðustu tveimur heimaleikjum er 8-7!

Dómari leiksins er hinn ungi Helgi Mikael Jónasson. Helgi er reyndar 24 ára gamall en það þykir ungt í dómaraárum.

Honum til aðstoðar eru Bryngeir Valdimarsson og Ásgeir Þór Ásgeirsson á línunum og Bjarni Hrannar Héðinsson er varadómari. Grétar Guðmundsson er svo eftirlitsdómari.

FH-ingar létu einnig vita af sér í júlíglugganum. Veigar Páll Gunnarsson fór í Víking Reykjavík og Jonathan Hendrickx skrifaði undir hjá Leixoes S.C. í Portúgal.

Nýjir leikmenn bættust einnig við en franski hægri bakvörðurinn Cédric D'Ulivo kom frá Belgíu þar sem hann hefur spilað undanfarin ár. Honum er ætlað að leysa Hendrickx af hólmi. Króatíski kantmaðurinn Matija Dvornekovic kom svo til liðsins á síðasta degi félagsskiptagluggans en hann varð deildarmeistari með félagi sínu í Albaníu á síðustu leiktíð. Hvorugur mátti spila gegn Maribor í Evrópukeppninni í vikunni og því gætu þeir spilað sinn fyrsta leik fyrir FH hér í dag.

KA bætti við sig króatíska miðverðinum Vedran Turkalj í júlíglugganum. Honum er ætlað að fylla skarð fyrirliðans Guðmanns Þórissonar sem er meiddur og verður væntanlega ekki meira með á tímabilinu. Undir lok gluggans var svo mikið um að vera í útgönguhurð KA-heimilisins en Halldór Hermann Jónsson og Baldvin Ólafsson fóru á láni til Magna á Grenivík ásamt því að Ívar Örn Árnason hélt til Bandaríkjanna í nám.

Liðin mættust í Kaplakrika í 2.umferð þar sem úrslit réðust í uppbótartíma. 2-2 jafntefli varð niðurstaðan. Hallgrímur Mar kom KA í 1-0 en Steven Lennon og Kristján Flóki skoruðu sitt hvoru megin við hálfleikinn og komu FH í 2-1. Ásgeir Sigurgeirsson jafnaði svo fyrir KA á 94.mínútu!

Fyrir leikinn í dag sitja gestirnir úr Hafnarfirði í 4.sæti með 20 stig, 10 stigum á eftir toppliði Vals. Sigur í dag fleytir þeim upp í 2.sætið en jafntefli kemur þeim í 3.sætið, fyrir ofan Grindavík á markatölu.

Heimamenn í KA sitja í 8.sæti með 15 stig og geta með sigri klifrað upp í 6.sæti. Jafntefli breytir þeirra stöðu í töflunni ekki.

Góðan daginn!
Við verðum hér með beina textalýsingu í dag frá lokaleik 13.umferðar Pepsi deildar karla á milli KA og FH.