Jæja liðin eru mætt út á völl. Trommusláttur úr stúkunni og leikmenn KA kasta KA-treflum upp til áhorfenda. Gengur misjafnlega að drífa alla leið upp í stúku.

Umræða um fjölda uppalda í byrjunarliðinu í fréttamannastúkunni. Vinsæl umræða þegar rætt er um ríginn milli KA og Þórs.

Nokkrar mínútur í leikinn.

Að sjálfsögðu höfðinglegar móttökur sem maður fær á Akureyri. Hér eru KA-menn búnir að búa til skemmtilega aðstöðu fyrir aftan annað markið, gamall vélaskúr sem er búið að gera upp sem upphitunaraðstöðu fyrir stuðningsmenn. Pizzur og ískaldur léttöl á krana. Leiðinlegt að þurfa að afþakka bjórinn.

Ég er búinn að vera að flakka um norðurhluta landsins um helgina og sá einmitt leikmenn KA á Húsavík á laugardaginn. Menn voru að þjappa sér saman með mórölskum degi. Vel við hæfi að gera það á Húsavík enda lykilmenn KA sem koma þaðan.

Byrjunarliðin eru klár og þau má sjá hér sitthvorum megin við textann.

KA gerir eina breytingu á liðinu frá 2-2 jafntefli við Fjölni í síðustu umferð. Elfar Árni Aðalsteinsson kemur inn fyrir Steinþór Frey Þorsteinsson.

Engin breyting er á liði Stjörnunnar frá 2-0 sigrinum á Breiðabliki í síðustu umferð.

Eigum við ekki að fara að byrja þetta? Fyrstu 11 eru búnir að reima skóna og tilbúnir í slaginn! #InnMedBoltann #fotboltinet pic.twitter.com/gF4VTjijZs

— Stjarnan FC (@FCStjarnan) August 14, 2017

Erlendur Eiríksson málarameistari dæmir leikinn á Akureyri í kvöld. Á línunum er hann með þá Gylfa Má Sigurðsson og Adolf Þorberg Andersen sér til aðstoðar og þá er Ásgeir Þór Ásgeirsson skiltadómari. Einar K. Guðmundsson er eftirlitsmaður KSÍ á leiknum.

Guðlaugur Baldursson þjálfari Keflavíkur spáði í leiki umferðarinnar fyrir Fótbolta.net

KA 2 - 3 Stjarnan
KA-menn hafa verið óútreiknanlegir síðustu vikurnar en það er langt síðan að Stjarnan tapaði í deildinni og ég held að það gerist ekki í þessum leik. Þetta verður fjörugur markaleikur.

Stjarnan er í 2. sæti deildarinnar með 25 stig, fimm stigum á eftir toppliði Vals sem á leik gegn KR í kvöld.

KA menn eru í baráttu á hinum enda deildarinnar, hafa 17 stig í 8. sætinu og eru fjórum stigum frá ÍBV sem er í fallsæti, næst neðsta sætinu.

Liðin mættust fyrr í sumar í 4. umferð deildarinnar. Sá leikur fór fram 21. maí og þá vann Stjarnan 2-1 sigur.

Guðjón Baldvinsson kom Stjörnunni yfir en Ásgeir Sigurgeirsson jafnaði metin. Eyjólfur Héðinsson skoraði svo sigurmarkið þegar 7 mínútur voru komnar framyfir venjulegan leiktíma.

Halló!

Hér á Akureyri verður spilað í Pepsi-deildinni í kvöld þar sem KA tekur á móti Stjörnunni í Pepsi-deildinni.

Leikurinn hefst 18:00 og hér fylgjumst við með öllu því helsta sem gerist.