Nú styttist verulega í að Óli Njáll flauti þennan toppslag á!! Vallarþulurinn er hér með gríðarlega takta í upptalningu leikmanna heimaliðsins! Skemmtir sér vel við þetta.

Byrjunarliðin eru klár.

Heimaliðið gerir 3 breytingar á sínu liði frá jafnteflinu gegn Tindastól í síðasta leik. Inn koma þær Sigurrós Eir Guðmundsdóttir, Andrea Rut Bjarnadóttir og Hafrún Sigurðardóttir og þær Sóley M. Steinarsdóttir, Guðfinna Kristín Björnsdóttir og María Rós Arngrímsdóttir detta úr byrjunarliðinu.

Gestirnir gera 2 breytingar á sínu liði frá tapinu gegn Kefalvík. Inn koma þær Edda Mjöll Karlsdóttir og María Soffía Júlíusdóttir en sæti þeirra á bekknum taka þær Ragnheiður Kara Hálfdánardóttir og Ástrós Silja Luckas.

Bæði þessi lið hafa leikið í deild þeirra bestu; Þróttur síðast árið 2015 og HK/Víkingur síðast árið 2013. Bæði lið voru nýliðar í deildinni þessi ár og féllu aftur á sínu fyrsta ári. Þróttur endaði í neðsta sæti deildarinnar árið 2015 en HK/Víkingur endaði í næstneðsta sæti árið 2013, með jafnmörg stig og Afturelding í sætinu fyrir ofan, en féllu á markatölu.

Öll árin síðan HK/Víkingur féll úr efstu deild hafa þær komist í úrslitakeppnina í 1. deildinni. En þar hafa þær alltaf beðið lægri hlut og þurft að sætta sig við áframhaldandi veru í 1. deildinni. Nú er fyrirkomulagið annað þar sem ekki verður úrslitakeppni heldur fara efstu 2 liðin beint upp í Pepsideildina. Því mætti ætla að þetta fyrirkomulag hentaði HK/Víkingi afskaplega vel þar sem þær hafa unnið sinn riðil undanfarin 2 ár. En nú reynir á og þær hreinlega verða að vinna hér í dag. Þær eiga nefnilega eftir að spila við núverandi topplið deildarinnar, Selfoss, í síðustu umferð sumarsins!!

Síðustu leikir beggja liða voru spilaðir á fimmtudaginn þar sem segja má að bæði lið hafi örlítið misstigið sig. Þá töpuðu HK/Víkingsstúlkur fyrir Keflavík, sem opnaði í raun þennan möguleika þeirra á að blanda sér almennilega í toppbaráttuna. Þróttur gerði svo jafntefli við lið Tindastóls sem situr í 9. sæti, fallsæti, deildarinnar.

Ætli við megum ekki búast við því að leikmenn beggja liða mæti því dýrvitlausar hér til leiks, staðráðnar í að bæta upp fyrir slök úrslit í síðasta leik sínum?

Eins og ég nefndi hér í upphafi þá er um að ræða sannkallaðan toppslag hér í kvöld! Fyrir leikinn er Þróttur í 2. sæti deildarinnar með 29 stig og HK/Víkingur í 3. sætinu með 27 stig. Á toppnum situr Selfoss með 32 stig eftir 0-1 sigur á útivelli gegn ÍR í gærkvöldi.

Með sigri getur því heimaliðið jafnað Selfoss að stigum á toppnum og ýtt sér aðeins frá gestunum sem narta í hælana á þeim! En fari gestirnir með sigur að hólmi munu þær koma sér upp fyrir heimaliðið og gera toppbaráttuna enn jafnari!

En svo má ekki gleyma því að hinn leikur kvöldsins, þar sem Víkingur Ó. og Keflavík eigast við, getur einnig haft áhrif á toppbaráttuna. Fyrir leiki kvöldsins situr Keflavík í 4. sæti deildarinnar með 24 stig. Það þýðir að þær geta, með sigri, jafnað HK/Víking að stigum ef það fer þannig að HK/Víkingur tapar hér í kvöld! Og hvernig sem fer hér í kvöld þá vilja Keflvíkingar auðvitað taka öll 3 stigin í sínum leik þar sem það kemur þeim í bullandi toppbaráttu ásamt þessum þremur fyrrnefndu liðum.

Góðan og margblessaðan daginn kæru lesendur Fótbolta.net!

Hér ætla ég að sjá til þess að þið missið ekki af neinu mikilvægu sem tengist viðureign Þróttar R. og HK/Víkings í toppslag 1. deildar kvenna!