Hér var verið að verðlauna Elfar Frey fyrir leik.

Sá hefur nú leikið 200 leiki fyrir klúbbinn. Er bara á 28.aldursári og getur bætt verulega við.

Vallarþulurinn hér engu gleymt, tínir upp nöfn allra sem eru að taka þátt í leik dagsins.

Ætti að hafa nafnakall í stúkunni bara líka, biðja fólk að standa upp og kynna sig.

Tæki ekki langan tíma....

Hér í kvöld er hægt að tala um viðureign "uppöldu" liðanna í deildinni.

Mér sýnist samtals vera hægt að telja 15 leikmenn samtals í þessum liðum sem hafa leikið í yngri flokkum félaganna.

6 Blikar og 9 Skagamenn.

Vel gert finnst mér...

Nú er bara komið að því að kalla neyðarkall.

Það eru 17 mínútur í leik og það er mættir 21 einstaklingur í stúkuna og bílastæðin við völlinn tóm.

Stefnir í hryllilega mætingu á Kópavogsvöll í kvöld.

Liðin á kafi í upphitun þessa stundina. Ármann Smári stýrir af röggsemi hjá gestunum í bland við Jon Þór.

Siggi Jóns og Þórður Guðjóns mættir í liðsstjórn Skagamanna.

Tek það skýrt fram að nafni minn Bö lá ekki á hliðinni í neðangreindri myndatöku...ég með skakka myndavél.

Ég minni á að þeir sem vilja henda inn umræðupunktum í þessa lýsingu setja myllumerkið #fotboltinet inn í twitterfærslur sínar yfir leiknum og ég hendi inn áhugaverðum pælingum.

Endilega hjálpa mér ef eitthvað skemmtilegt dúkkar upp!

Dómarateymi dagsins er svo skipað.

Þorvaldur Árnason flautar, honum til aðstoðar eru Jóhann G. Guðmundsson og Gylfi Már Sigurðsson.

Fjórði dómari er Sigurður Óli Þorleifsson og í eftirlitinu í dag er Björn Guðbjörnsson.

Talandi um fagmennsku!

Fyrrnefndur Gísli tekur út leikbann vegna gulra spjalda í dag en að öðru leyti hafa Blikar fullskipaðan hóp.

Skagamenn segjast hafa úr fullmönnuðum leikmannahóp að velja.

Fyrri leik liðanna lauk með 2-3 sigri Blika uppi á Akranesi.

Arnþór Ari gerði 2 mörk Blika og Gísli Eyjólfsson eitt. Fyrir Skagamenn skoruðu Þórður Þ. Þórðarson og Arnar Már Guðjónsson.

Það var fyrsti sigurleikur Milosar sem Blikaþjálfara í sumar.

Skagamenn unnu síðast leik 19.júní þegar þeir sigruðu Fjölnismenn 3-1. Hafa fengið 2 stig í síðustu 7 leikjum, form sem hefur skilað þeim í neðsta sæti deildarinnar.

Blikar hafa verið brokkgengir í sumar en tveir sigrar í síðustu þremur leikjum hafa lyft þeim af mesta hættusvæðinu. Síðasta leik unnu þeir sannfærandi, 0-3 í Ólafsvík.

Skagamenn mæta til leiks í kvöld með nýjan þjálfara í brúnni.

Gunnlaugur Jónsson sagði starfi sínu lausu eftir 0-1 tap fyrir ÍBV í síðustu umferð og við tók Jón Þór Hauksson sem hefur gegnt starfi aðstoðarþjálfara í sumar. Gaman verður að sjá hverjir verða við hans hlið á bekknum þar sem að ansi mikil leikreynsla er falin í bakhóp ÍA.

Leikurinn hefur mikla þýðingu í botnbaráttu deildarinnar.

Með sigri í dag myndu Blikar allt að því bjarga sér frá falli úr deildinni þar sem þeir fara upp í 24 stig þá.

Skagamenn þurfa nauðsynlega þrjú stig ef þeir eiga að eygja einhverja von um áframhaldandi veru á meðal þeirra bestu, sigur kæmi þeim upp í 13 stig og smá neista, tap kallar á það að enn brattari yrði brekkan úr neðsta sætinu.

Góðan dag og velkomin í beina textalýsingu frá Kópavogsvelli þar sem að grænklæddir heimamenn taka á móti gulklæddum gestum sínum af Akranesi í 17.umferð Pepsi-deildar.