Þá eru menn klárir í slaginn, KR enda upphitun sína á því að henda nýjum Nike-boltum upp í stúku til síns fólks.

Vel gert.

Ég ætla að misnota aðstöðu mína og bjóða sérstaklega velkomin nýjan leikmann á varamannabekk FH-inga og í PEPSI-hóp.

Sá heitir Baldur Logi Guðlaugsson af Ölduslóðinni. Sonur Guðlaugs Baldurssonar aðalþjálfara Keflavíkur og Helgu Kristínar Gilsdóttur af einni römmustu FH-ætt Hafnarfjarðar.

Strákur er á yngra ári í þriðja flokki, fæddur 2002.

Byrjunarliðin eru hér til hliðar!

FH-ingar eru vængbrotnir í kvöld og alls þarf Heimir Guðjónsson að gera fjórar breytingar á liðinu frá því í leiknum gegn Stjörnunni.

Bergsveinn Ólafsson, Cédric D'Ulivo, Emil Pálsson og Halldór Orri Björnsson eru allir meiddir auk þess sem Pétur Viðarsson er í leikbanni eftir rauða spjaldið sem hann fékk eftir leikinn í Garðabæ á sunnudag.

Gunnar Nielsen, markvörður FH, er í verkefni með færeyska landsliðinu en hann fær að kljást við Cristiano Ronaldo og félaga í Portugal í kvöld.

Vignir Jóhannesson verður í markinu í kvöld og Bjarni Þór Viðarsson byrjar sinn fyrsta leik á tímabilinu eftir langa fjarveru vegna meiðsla. Króatíski kantmaðurinn Matija Dvornekovic byrjar einnig sinn fyrsta leik fyrir FH auk þess sem Þórarinn Ingi Valdimarsson kemur inn í liðið.

Áhugavert verður að sjá hver spilar við hlið Kassim Doumba í hjarta varnarinnar í fjarveru Péturs þar sem Bergsveinn er einnig frá vegna meiðsla. Böðvar Böðvarsson og Davíð Þór Viðarsson hafa báðir leikið þar áður með FH.

Hjá KR er ein breyting frá því í 2-2 jafnteflinu gegn Grindavík. Gunnar Þór Gunnarsson er fjarri góðu gamni og Kennie Chopart kemur inn fyrir hann.

Fyrri leik liðanna lauk með 2-2 jafntefli á KR vellinum.

Óskar Örn Hauksson og Arnór Aðalsteinsson skoruðu fyrir KR en Kristján Flóki Finnbogason og Atli Guðnason fyrir Hafnfirðinga.

Dómarateymið í dag er nú ekki af verri endanum!

Flautarinn kemur úr höfuðstað Norðurlands, Þóroddur Hjaltalín er sá. Hann tekur með sér að norðan AD2 sem eitir Eðvarð Eðvarðsson en AD1 er Kópavogssjarmörinn Frosti Viðar Gunnarsson.

Fjórði dómari er Egill Arnar Sigurþórsson og eftirlitsmaður KSÍ er enn einn norðanmaðurinn, Maggi Siguróla!

Pétur Viðarsson mun taka út leikbann í kvöld eftir að hafa fengið rautt spjald í hasarnum eftir jafnteflið við Stjörnuna á mánudaginn.

Fréttir herma að Bergsveinn Ólafsson og Emil Pálsson séu meiddir og verði ekki með. KR eru án leikbanna og að því er heyrist bara allir heilir.

FH eru enn að gæla við draum um titil með sigri í kvöld, ef þeir vinna leikina sem þeir eiga inni verða þeir 6 stigum á eftir toppliði Vals.

KR eru klárlega að gera sér vonir um að ná 3.sæti sem gefur sæti í Evrópudeildinni á næsta ári. Til að það verði líklegra þurfa þeir stig í kvöld, allra helst þrjú.

Um frestaðan leik er að ræða, að honum loknum hafa KR leikið 17 leiki í deildinni en FH þá komnir í 16 og eiga þá bara einn leik eftir til að ná öllum liðum.

Þetta er af Evrópu-völdunum miklu hjá þessum tveimur liðum!!!

Góðan daginn og velkomin í beina textalýsingu frá leik FH og KR í PEPSI-deild karla.