Leikmenn ganga hér inná völlinn. Fólk er að koma sér fyrir og spennan er gríðarleg.

Fólk er hér að týnast á völlinn og geri ég kröfu á það að völlurinn verði þéttsetinn hér í dag. Stórlaxar í Árbænum sötra hér á einum Egils Gull í heiðursstúkunni. Undirritaður virðir það.

Hjá Fylki kemur Emil Ásmundsson inn í liðið fyrir Andrés Már Jóhannesson síðan í sigrinum gegn Selfyssingum.

Athygli vekur að Viktor Jónsson byrjar á bekknum hjá Þrótti í kvöld. VIktor er langmarkahæsti leikmaður Þróttar í sumar en hann hefur skorað tíu af 28 mörkum liðsins í Inkasso-deildinni.

Daði Bergsson fer einnig á bekkinn frá því í sigrinum gegn Leikni Fáskrúðsfirði en þeir Sveinbjörn Jónasson og Víðir Þorvarðarson koma inn í liðið. Hreinn Ingi Örnólfsson snýr einnig aftur eftir leikbann en hann tekur stöðu Karls Brynjars Björnssonar í vörninni.

Það er enginn í leikbanni hjá hvorugu liði og engin ný meiðsli sem að ég veit af. Það þýðir einfaldlega það að bæði lið mæta til leiks með sína sterkustu hópa. Það eru frábærar fréttir fyrir hinn hlautlausa fótboltaáhugamann.

Þar höfum við það. Fimm ólíkir spádómar frá fimm ólíkum snöppurum. Verður áhugavert að sjá hvort að einhver þeirra hefur rétt fyrir sér þegar upp er staðið.

Daníel Már (snap:djaniel88)

,,Ég spái því að leikurinn verði flautaður af á sjötugustu."

Viðar "Enski" Skjóldal (snap:enskiboltinn)

,,Fylkir vinnur 2-1."

Brynjar Steinn (snap:binniglee)

,,Haha ég veit ekkert um fótbolta og hvað er að gerast en ég myndi giska á 3-2 fyrir Þróttum."

Hjálmar Örn Jónsson (snap:hjalmarorn110)

,,Þetta verður hörkuleikur en þarna mætast tvö lið af þeim fjórum sem að ég held með í Inkasso. Ætla að spá þessu sem markaleik 3-3 en annað liðið verður lent 2-0 undir eftir 25 mín."

Tryggvi Freyr Torfason (snap:tryggvu)

,,Ég held að þetta verði hörkuleikur. Það verður eitt rautt spjald í leiknum en ég hef ekki hugmynd um hvoru megin. Þetta fer 2-2 jafntefli. Albert Ingason skellir í tvö mörk og Viktor Jónsson og Rafn Andri með mörkin fyrir Þróttara."

Eins og áður kom fram er þessi leikur gríðarlega mikilvægur og fannst mér því vel við hæfi að fá fleiri til að spá í spilin. Ég fékk þess vegna fimm fræga snappara til að gefa sitt mat á þessum stórleik.

Tómas Þór Þórðarson, íþróttafréttamaður 365, spáði í 20.umferð Inkasso-deildarinnar. Hann spáir Fylkismönnum 2-1 sigri.

,,Fylkir er ekki með lið til að spila upp á jafntefli og Þróttur vann síðasta leik sem þýðir að liðið tapar núna. Fylkir klárar þetta undir lokin þegar Þróttur er að leita að sigurmarki." sagði Tómas Þór um þennan leik.

Fylkir vann góðan 2-1 útisigur á Selfossi í síðustu umferð og sáu Ragnar Bragi Sveinsson og Albert Brynjar Ingason um að skora mörkin.

Þróttur vann Leikni F. á heimavelli 2-0 þar sem að Viktor Jónsson og Rafn Andri Haraldsson skoruðu mörkin.

Fylkismenn sitja í öðru sæti deildarinnar með 39 stig á meðan að Þróttarar fylgja þeim fast á eftir í þriðja sætinu með 36 stig. Markatala Fylkis er mun betri heldur en markatala Þróttar þannig að það dugar ekkert nema sigur fyrir gestina hér í dag vilji þeir ennþá eiga séns á sæti í Pepsi-deildinni að ári.

Komiði sæl og blessuð og veriði hjartanlega velkomin í þessa beinu textalýsingu á stórleik Fylkis og Þróttar R.

Þessi leikur er mjög mikilvægur fyrir bæði lið og gæti reynst ansi afdrifaríkur í baráttunni um sæti í Pepsi-deildinni.