Jæja, liðin labba inn á völlinn og Reykjavík er okkar hljómar!

Twitter samfélagið fylgist sannarlega með!

Bóas er ekki mættur. Deeeejók. Hann er svo sannarlega á sínum stað!

Þá er komið að spá frá blaðamannastúkunni:
Sindri Sverris, mbl: 3-1 fyrir KR
Ástrós, Vísir.is: 3-0 fyrir KR
Maggi, Vísir.is: 2-1
Tryggvi Guðmunds: Drulluleiðinlegt 1-1
Magnús Lúðvíksson, vallarþulur: Spái sannfærandi 2-0 sigri
Sjálfur spái ég 1-0 fyrir KR

Start Me Up með Rolling Stones er blastað um Alvogen-völlinn sem stendur! Þvílík negla þetta lag hjá annars stórlega ofmetinni hljómsveit.

Það er stór dagur hjá ÍBV fólki í dag. Karlaliðið mætir KR eftir 20 mín og svo kl 17.00 er bikarúrslitaleikur hjá kvennaliðinu þar sem Stjarnan og ÍBV mætast. Hópferð var farin frá Eyjum á þessa leiki og verður forvitnilegt að fylgjast með baráttu um stúkunna í Vesturbænum í dag.

Vil hvetja fólk til að nota Twitter og myllumerkið #fotboltinet til að taka þátt í textalýsingunni.

KR teflir fram því liði sem flestir hefðu búist við, enda stilla þeir upp sama liði og vann FH í Krikanum.

Kaj Leo og Mikkel Maigaard eru á bekknum hjá ÍBV hér í dag. Shahab Zahedi er í byrjunarliðinu sem og Hafsteinn Briem.

Næstu leikir liðanna eru 14. september, sem svo skemmtilega vill til að er afmælisdagurinn minn. Þá tekur ÍBV á móti Grindavík og KR sækir Magga Bö heim og etur kappi við Breiðablik.

Úr þessum liðum er aðeins Tobias Thomsen sem kemst á topp 10 lista yfir markahæstu menn Pepsi í sumar en hann er með 8 mörk. Liðin hafa ekki verið að raða inn mörkum og segir það sína sögu að þó að KR sé sem stendur í Evrópusæti og ÍBV í fallsæti að þá hefur KR aðeins skorað 5 mörkum meira.

Fyrri leikur liðanna fór 3-1 fyrir ÍBV. Andri Ólafs skoraði eitt mark, Sindri Snær tvo en Tobias Thomsen skoraði fyrir KR.

Liðin unnu sitt hvorn heimaleikinn á síðustu leiktíð. ÍBV vann 1-0 með marki Bjarna Gunnarssonar á meðan KR vann 2-0 með mörkum Morten Beck Andersen og Óskars Arnar Haukssonar. Ljóst er að aðeins Óskar Örn á möguleika á að skora í leiknum í dag af þeim sem skoruðu í fyrra.

Þjálfarar liðanna hafa ósjaldan vakið athygli með ummælum sínum eftir leiki. Willum er oft og tíðum granítharður og tilvalið að rifja upp þetta viðtal sem Benedikt Bóas, góðvinur fótbolta.net, tók um árið.

- Kristján Guðmundsson hefur ósjaldan skrifað fyrirsagnir með tilsvörum sínum. Hér eru nokkur dæmi:
Við erum komnir í störukeppni við falldrauginn
Þeir sýndu ekki kurteisi
Tek djammæli á sviðinu
Hleypa þeim í sandkassann og þá leika þeir sér

ÍBV er í fallsæti með 16 stig. Fjölnir og Ólafsvíkur-Víkingar eru með þremur stigum meira og á Fjölnir leik til góða. Bikarmeistararnir frá Vestmannaeyjum fóru illa af ráði sínu í síðasta leik og töpuðu 2-3 fyrir Val. Lokatölur gefa ekki alveg rétta mynd af leiknum því Valur var talsvert betri aðilinn í leiknum og fékk á sig seinna markið í blálokin.

KR kom sér heldur betur í Evrópubaráttuna með 0-1 sigri á FH í síðasta leik. Eina mark leiksins gerði Tobias Thomsen og varð það einkar laglegt. Með sigrinum komst KR í 3. sætið og er með stigi meira en bæði FH og Grindavík. Því skal haldið til haga að FH á leik inni á KR.

Góðan daginn góðir hálsar! Hér ætla ég að textalýsa leik KR og ÍBV og er óhætt að segja að mikið sé undir fyrir bæði lið.