Liðin er komin inná völlinn og stilla sér upp. Hér er verið að heilsa einhverju einvalaliði með handabandi áður en þetta getur allt saman farið í gang.

Liðin hafa lokið upphitun og ganga til búningsherbergja! Það er rétt rúmlega korter í þessa veislu!

Byrjunarliðin eru klár!!

Þar er í raun ekkert óvænt þar. Kristrún Kristjánsdóttir og Harpa Þorsteinsdóttir koma inn í byrjunarlið Stjörnunnar frá síðasta leik þeirra í Pepsideildinni. Á bekkinn fara í staðinn Donna Key Henry og Bryndís Björnsdóttir. Bæði Kristrún og Harpa hafa einmitt reynslu af því að byrja bikarúrslitaleik og það hlýtur að hafa vegið þungt í þessari ákvörðun.

ÍBV gerir sömuleiðis 2 breytingar á sínu liði frá síðasta leik sínum. Þar koma inn Cloé Lacasse og Rut Kristjánsdóttir en í staðinn eru það Clara Sigurðardóttir og Júlíana Sveinsdóttir sem taka sér sæti á bekknum. En þess má geta að bæði Cloé og Rut voru í leikbanni í síðasta leik ÍBV en hafa verið að byrja leiki liðsins fram að því. Þær koma því alveg óþreyttar inní þennan leik.

Það helsta sem vekur athygli mína er að Þóra Björg Helgadóttir er á skýrslu sem varamarkmaður Stjörnunnar! Hún hefur ekki verið titluð sem varamarkvörður liðsins hingað til á þessu tímabili. En hún er auðvitað mjög leikreyndur leikmaður og getur eflaust miðlað af reynslu sinni. Ég get ekki betur séð en að hún hafi hampað bikarmeistaratitlinum alls 5 sinnum á sínum ferli sem er mikið afrek!

Guðmunda Brynja Óladóttir hlýtur að vera glorhungruð í þennan titil en hún tapaði einmitt úrslitaleikjunum árin 2014 og 2015 með Selfossi. En bæði þessi ár vann einmitt Stjarnan, liðið sem hún leikur með í dag. Hún hlýtur að vera búin að bíða eftir þessum degi lengi!

Nú þessi leikur hér í dag fer í sögubækurnar þar sem þetta verður fyrsti úrslitaleikur bikarkeppninnar þar sem kona dæmir. Bríet Bragadóttir mun dæma leikinn og henni til aðstoðar verða Eðvarð Eðvarsson og Gunnar Helgason.

Það er sömu sögur að segja um byrjunarlið Stjörnunnar frá árinu 2015 en úr því liði eru einnig margir leikmenn farnir frá félaginu. Í heildina eru 6 af þeim leikmönnum farnir frá félaginu af þeim 11 sem byrjuðu og ein þeirra, Ásgerður Stefanía Baldursdóttir, er ólétt. Þær sem eru eftir eru þær Ana Victoria Cate, Kristrún Kristjánsdóttir, Harpa Þorsteinsdóttir og Írunn Þorbjörg Aradóttir.

Af þeim 11 leikmönnum sem byrjuðu úrslitaleikinn fyrir lið ÍBV í fyrra eru 7 farnar til annarra liða. Þær 4 sem enn spila fyrir ÍBV eru þær Sóley Guðmundsdóttir, fyrirliði, Júlíana Sveinsdóttir, Sigríður Lára Garðarsdóttir og Cloé Lacasse. Það má gera ráð fyrir að þessi reynsla þeirra frá síðasta ári muni telja mikið þegar Ian Jeffs þjálfari velur sitt byrjunarlið hér í dag.

Bæði liðin hafa tvisvar sinnum þurft að bíta í það súra epli að tapa úrslitaleiknum.

ÍBV lék fyrst til úrslita árið áður en þær unnu titilinn, eða árið 2003, þar sem þær töpuðu fyrir liði Vals 1-3. Þær spiluðu svo aftur til úrslita í fyrra, gegn Breiðablik, þar sem þær þurftu að játa sig sigraðar 1-3.

Stjarnan lék fyrst til úrslita í bikarkeppninni árið 1993. Þar léku þær gegn ÍA sem hafði sigur 3-1. Stjarnan komst svo ekki aftur í úrslitin fyrr en árið 2010 en þá lutu þær í lægra haldi fyrir Val 0-1.

Stjarnan hefur þrisvar sinnum orðið bikarmeistari. Fyrst árið 2012 eftir 1-0 sigur á Val, næst árið 2014 eftir 4-0 sigur gegn Selfossi og síðast árið 2015 eftir 2-1 sigur gegn Selfossi.

Lið ÍBV hefur einu sinni orðið bikarmeistari en það var árið 2004 eftir 2-0 sigur á Val. Það er gaman að segja frá því að þjálfari ÍBV það ár var Heimir Hallgrímsson sem nú þjálfar íslenska karlalandsliðið.

Undanúrslitin voru leikin fyrir rétt tæplega einum mánuði síðan, eða 13. ágúst sl. Þar hafði Stjarnan betur gegn Val á heimavelli 1-0 eftir framlengdan leik. Markið skoraði Guðmunda Brynja Óladóttir á 117. mínútú.

ÍBV fór með sigur af hólmi gegn liði Grindavíkur en leikurinn fór fram í Vestmannaeyjum. Lengi vel leit út fyrir að ÍBV myndi fara með 1-0 sigur úr þessum leik en Grindvíkingar gáfust ekki upp og náðu að jafna á 6. mínútu uppbótartíma! Leikurinn fór svo alla leið í vítaspyrnukeppni þar sem ÍBV stúlkur sigruðu loks 4-2.

Góðan og blessaðan daginn kæru lesendur Fótbolta.net. Í dag er sannkallaður hátíðisdagur því í dag fer fram einhver skemmtilegasti leikur sumarsins! Já, ég er að tala um úrslitaleikinn í Borgunarbikar kvenna þar sem Stjarnan og ÍBV mætast, á Laugardalsvelli kl. 17:00.

Hér fer fram bein textalýsing frá veislunni sem Stjarnan og ÍBV ætla að bjóða okkur uppá!