Liðin ganga út á völlinn. Afskaplega döpur mæting í stúkunni! Vonandi fjölgar hratt og vel því þetta er nánast vandræðalegt.

Í stúkunni hér í Garðabænum er ekki bara verið að ræða um fótbolta. Benedikt Sveinsson kaupsýslumaður er í umræðunni líka. Sumt skrifar maður ekki undir. Förum ekki nánar út í þá umræðu...

Er Zoran Miljkovic mættur í stúkuna? Ég get svarað því. Já hann er mættur!

Ég er í góðum félagsskap í fjölmiðlastúkunni. Fæ góða menn til að spá.

Gummi Hilmars á Mogganum: 3-0 sigur Stjörnunnar.
Smári Jökull á Vísi: Ég ætla að segja... (mikið hugsað)... 2-1 Stjarnan.

Úrslit staðfest úr öðrum leikjum 19. umferðar.

Víkingur Ólafsvík er í fallsæti þegar þessi leikur er flautaður á. Fjölnir og ÍA gerðu jafntefli og ÍBV vann Grindavík.

Með sigri í kvöld komast Ólsarar upp í 9. sæti.

Svona er staðan áður en síðasti leikur 19. umferðar, Stjarnan - Víkingur Ó, er flautaður á #fotboltinet pic.twitter.com/52wPM4ZK0R

— Fótbolti.net (@Fotboltinet) September 14, 2017

Vinsælasta lag Íslands í dag sett á hæsta styrk nú þegar stutt er í leik. B.O.B.A. með Króla og JóaPé. Jói einmitt úr Garðabænum. Geggjað lag.

Hamborgaralyktin svífur yfir allan Garðabæinn. Ég svelti mig einmitt í dag fyrir þessa kvöldstund hér á Samsung-vellinum. Að vanda var Páló fyrsti áhorfandinn sem mætti á völlinn.

Byrjunarliðin eru komin inn.

Ejub Purisevic reynir að þétta varnarleikinn og gerir varnarsinnaða breytingu á byrjunarliðinu. Pape Mamadou Faye fer á bekkinn. Alexis Egea kemur inn.

Hjá Stjörnunni er Eyjólfur Héðinsson settur í byrjunarliðið en hinn ungi Alex Þór Hauksson er á bekknum.

Það er búið að kveikja á tónlistinni, verið að vökva völlinn og allt í gír hérna á Samsung vellinum.

Fyrir leik eru allir í góðu skapi. Er búinn að hitta dómarana, Dúlluna, Ejub og Davíð Snorra. Allir svona líka hressir! Ég lofa ykkur því að þeir verða ekki allir hressir eftir leik í kvöld. Það getur ekki verið.

Alls hafa þessi lið mæst 14 sinnum í leikjum á vegum KSÍ. Stjarnan hefur unnið 6 leiki, Víkingur Ólafsvík 3 og 5 viðureignir hafa endað með jafntefli. Markatalan 25-15, Stjörnunni í vil.

Þrotamennirnir í vörninni
Víkingur Ólafsvík berst fyrir lífi sínu, liðið er einu stigi fyrir ofan fallsæti þegar þetta er skrifað.

Varnarleikur liðsins hefur fengið harða gagnrýni að undanförnu enda hafa lekið inn 12 mörk í síðustu þremur leikjum. Þrotamenn er orðið sem Óskar Hrafn Þorvaldsson notaði í Pepsi-mörkunum um miðverði liðsins.

Verður fjör á hliðarlínunni?
Maður blótar því að fréttamannastúkan sé ekki nálægt varamannabekkjunum. Aðstoðarþjálfarar Stjörnunnar, Brynjar Björn og Davíð Snorri, eru mættir úr banni! Davíð var mikið í sviðsljósinu í fyrri viðureign þessara liða í sumar en hann fór með himinskautum á hliðarlínunni og lét mann og annan heyra það.

Stjörnumenn voru alls ekki í sínum besta gír í þeim leik. Ólsarar unnu 2-1 með mörkum Kwame Quee og Guðmundar Steins Hafsteinssonar. Hilmar Árni Halldórsson skoraði fyrir Stjörnuna.

Guðmundur Steinn er á meiðslalista Ólsara og ólíklegt að hann komi meira við sögu á tímabilinu. Áfall fyrir gestina þar sem hann er þeirra markahæsti maður.

Gott og gleðilegt kvöld! Lokaleikur 19. umferðarinnar fer fram hér í Garðabænum þar sem Stjarnan og Víkingur Ólafsvík eigast við. Ég mun fylgja ykkur í gegnum leikinn en það er Þóroddur Hjaltalín sem sér um dómgæsluna.