Það eru ekkert sérstakar aðstæður á höfuðborgarsvæðinu, 10 stiga hiti, rok og gengur á með skúrum. Sigurður Óli Þórleifsson dæmir leikinn í dag. Breki Sigurðsson og Skúli Freyr Brynjólfsson eru línuverðir og Slava Titov er skiltadómari. Akurnesingurinn Ólafur Ingi Skúlason er svo eftirlitsmaður KSÍ.

Í annað skiptið á tímabilinu hafa Haukar misst aðalmarkvörð sinn í meiðsli því Terrance William Dieterich sem hefur varið markið í síðustu átta leikjum puttabrotnaði á æfingu í vikunni og verður ekkert meira með í sumar. Þetta gerist sléttum tveimur mánuðum eftir að Trausti Sigurbjörnsson meiddist og varð frá út tímabilið. Terrance William var fenginn í hans stað þá en núna þarf Árni Ásbjarnarson varamarkvörður að leysa stöðuna.

Fylkir vann gríðarlega mikilvægan 3-1 sigur á Þrótti í síðustu umferð á sama tíma og Haukar töpuðu 6-0 á útivelli gegn Leikni Fáskrúðsfirði sem er gott að því fallið úr deildinni.

Þetta segir okkur þó alls ekki að verkefnið verði auðvelt fyrir Fylkismenn í dag því Haukar eiga gríðarlega sterkan heimavöll eins og kom fram í tölfræði útreikningum Arnars Daða Arnarssonar tölfræðings Fótbolta.net.

Á Ásvöllum hafa Haukar leikið 32 leiki á síðustu þremur árum, gert 6 jafntefli og tapað fjórum leikjum.

Síðasti tapleikurinn kom gegn Grindavík 21. júlí árið 2016.

Þórarinn Ingi spáði í næstsíðustu umferð í Inkasso-deildinni fyrir Fótbolta.net

Haukar 2 - 2 Fylkir
Tveir grilluðustu menn deildarinnar mætast hér. Albert Brynjar og Bjöggi Stef. Myndi setja tvö mörk á báða en verð því miður að setja einungis eitt á Albert þar sem að ég hef heyrt að hann eyði óhóflegum tíma í barna golfleik í Playstation þessa daganna. Einbeiting af skornum skammti.

Fótbolti.net verðlaunar markahæsta leikmann mótsins á lokahófi 29. september næstkomandi. Baráttan um gullskóinn verður háð hér á Ásvöllum í dag.

Björgvin Stefánsson (Haukum) og Albert Brynjar Ingason (Fylki) eru í 2. - 3. sæti með 14 mörk, einu marki frá Jeppe Hansen framherja Keflavíkur sem er markahæstur með 15 mörk.

Fyrri leikur liðanna fór fram á Floridana velli Fylkismanna 7. júlí síðastliðinn fyrir framan 550 áhorfendur.

Þá vann Fylkir 2-0 sigur með mörkum frá Valdimari Þór Ingimundarsyni og Oddi Inga Guðmundssyni en mörkin komu á síðustu 20 mínútunum.

Þetta er stór dagur fyrir Fylki því stig í dag mun duga þeim til að endurheimta sæti sitt í Pepsi-deild karla að nýju.

Fylkir féll úr deildinni á síðasta ári og allt stefnir í að liðinu muni takast markmið sitt að fara beint upp að nýju.

Liðið er í 2. sæti deildarinnar, einu stigi frá toppliði Keflavíkur en sex stigum á undan Þrótti og HK sem koma í 3. - 4. sætinu.

Haukar eru svo í 5. sæti með 33 stig og hafa í raun ekki að neinu að keppa í mótinu það sem eftir er.

Komiði sæl og verið velkomin í beina textalýsingu frá viðureign Hauka og Fylkis í 21. og næst síðustu umferð Inkasso-deildarinnar

Leikurinn sem fer fram á Ásvöllum í Hafnarfirði hefst klukkan 14:00 í dag.