Þess má til gamans geta að enginn annar en Siggi Hlö er vallarþulur hér á Víkingsvelli í dag. Það er öllu til tjaldað hér í Fossvoginum í dag.

Nú þegar rétt rúmlega 10 mínútur eru í leik er fólk farið að láta sjá sig. Hugsa að það verði hálf tómlegt hérna á Víkingsvellinum í dag.

Sólin virðist ætla að sýna sig aðeins. Við fögnum því.

Fyrri leikur liðanna á Skaganum endaði með 1-1 jafntefli. Tryggvi Hrafn Haraldsson, núverandi leikmaður Halmstad í Svíþjóð, kom ÍA yfir áður en að Alex Freyr jafnaði leikinn.

Byrjunarliðin eru komin hingað inn. Skagamenn eru með óbreytt lið frá jafnteflinu gegn Stjörnunni. Víkingur gerir eina breytingu á sínu liði en þá kemur reynsluboltinn Veigar Páll inn fyrir Viktor Bjarka.

Benedikt Valsson, sem að er núna að slá í gegn í þáttunum ,,Hásetar", var sérlegur spámaður Fótbolta.net fyrir þessa umferð. Við skulum gefa honum orðið.

Víkingur R. 1 - 1 ÍA
Skagamenn sem ættu að vera í veseni með að gíra sig í leikinn koma á óvart og gera gott jafntefli. Mark Víkinga verður áberandi flott. Giska á Arnþór eða Dofri eigi markið.

Enginn leikmaður hjá hvorugu liði er í leikbanni og ég hef ekki frétt af neinum nýjum meiðslum. Það þýðir einfaldlega það að bæði lið mæta með sín sterkustu byrjunarlið. Við hlutlausu fótboltaáhugamennirnir fögnum því.

Skagamenn sitja í neðsta sæti deildarinnar með 15 stig og er ljóst að þeir munu spila í Inkasso deildinni að ári. Víkingur R. situr hins vegar í 7.sæti deildarinnar með 26 stig og er það morgun ljóst að þeir verði áfram í deild þeirra bestu. Þessi leikur er því einungis liður í því að klára þetta tímabil með sæmd.

Góðan og blessaðan daginn! Hér mun fara fram bein textalýsing á leik Víkings R. og ÍA.