Það styttist verulega í þetta núna. Fyrirliðarnir heilsast.

Athygli vekur að Breiðablik er með 4 leikmenn á varamannabekknum en þar af er Fjolla Shala einn þeirra leikmanna. Fjolla sleit krossband á síðasta tímabili og er nokkuð ljóst að hún er ekki að fara að spila hér í dag þar sem hún er ekki komin á það stig í endurhæfingunni sinni.

Teymið í kringum Blikana getur ekki hafa reiknað með því að þau gætu staðið í sporunum sem þau eru í í dag þar sem þau hafa leyft Fanndísi að fara til liðs í Frakklandi fyrir um mánði síðan og svo núna síðast hleyptu þau Berglindi til liðs á Ítalíu. Ef mér telst rétt til þá hafa þau einnig misst 4 leikmenn í háskóla í Bandaríkjunum.

Byrjunarlið klár!

Steini gerir eina breytingu á sínu liði frá síðasta leik Blikanna, sigri gegn Stjörnunni, en þar fer Berglind Björg Þorvaldsdóttir út og Guðrún Gyða Haralz kemur inn. Blikarnir tilkynntu það strax eftir leik þeirra gegn Stjörnunni að Berglind væri á förum til Verona á Ítalíu.

Gestirnir gera eina breytingu á sínu liði en þar kemur Carolina Mendes inn fyrir Helgu Guðrúnu Kristinsdóttur, sem er reyndar ekki á skýrslu í dag. Það þarf kannski engan að undra að Carolina Mendes komi inní byrjunarliði en hún kom inná í hálfleik gegn Þór/KA og það tók hana ekki nema um eina mínútu að skora mark! Hún spilaði afar vel í þessum hálfleik sem hún fékk þar og spurning hvað hún sýnir okkur í dag.

Það er því mikið undir og alveg ljóst að Blikastúlkur munu gefa allt sem þær eiga í þennan leik og vonast svo eftir hagstæðum úrslitum fyrir norðan.

En það má þó ekki gleyma andstæðingunum, þó að öll augu beinist eflaust að Breiðablik og Þór/KA. En Grindavík gerði sér lítið fyrir og vann Þór/KA í síðustu umferð, sem er jú ástæða þess að við fáum þessa spennu í lokaumferðinni. Þar sýndu þær kannski loksins þann leik sem allir höfðu verið að bíða eftir frá þeim í sumar. Þær vilja eflaust halda áfram að sýna þessa sparihlið og klára mótið á góðum úrslitum eftir hálfgert vonbrigðasumar, allavega ef marka má yfirlýsingarnar fyrir mót.

Það stefnir því allt í frábæran fótboltaleik hér í Kópavogi í dag!

Ég held að það viti allir hversu mikið er undir í þessum tveimur leikjum sem hefjast kl. 16:15; annars vegar leikur Breiðabliks og Grindavíkur og hins vegar leikur Þórs/KA og FH á Akureyri. En fyrir þá sem ekki vita þá er staðan þannig á toppi deildarinnar að Þór/KA leiðir með 41 stig og Breiðablik fylgir þétt á hæla þeirra með 39 stig. Breiðablik hefur heldur betri markatölu þannig að ef þær klára sinn leik hér í dag og Þór/KA tekst ekki að vinna FH fyrir norðan þá standa Blikastelpur uppi sem Íslandsmeistarar. En Þór/KA er þó með pálmann í höndunum, ef svo má að orði komast, og þurfa einfaldlega að klára sinn leik til að gera útum þessa baráttu og hampa titlinum.

Mikið hefur verið rætt um dagsetningu og tímasetningu þessara leikja í lokaumferð deildarinnar en það þýðir ekkert að ræða það neitt frekar. Svona er þetta. Nú er bara að taka daginn snemma, hætta snemma í vinnunni (eða skrópa í síðasta tímann í skólanum...) og leggja snemma af stað á völlinn. Umferðin á þessum tíma fær almennt ekki góða dóma hjá þeim sem sitja fastir í henni!

Góðan daginn! Það er stóóóóór dagur í dag! Í dag krýnum við nýja Íslandsmeistara í efstu deild kvenna og það verður annað hvort lið Þórs/KA eða Breiðabliks sem fagnar titlinum í lok dags.

Hér ætla ég að sjá til þess að þið, lesendur góðir, fáið allar upplýsingar frá leik Breiðabliks og Grindavíkur beint í æð. Leikurinn hefst stundvíslega kl. 16:15 á Kópavogsvelli.