Þjóðsöngvunum var að ljúka. Mjög áhugaverð útgáfa sem heyrðist af íslenska söngnum. Einskonar jazzútgáfa. Áhugavert.

Þýskar landsliðskonur eru heiðraðar hér fyrir leik. Fyrst er það Simone Laudehr sem fær viðurkenningu fyrir 100 leiki og síðan Anja Mittag sem fær verðskulduð heiðusverðlaun fyrir sitt framlag til fótboltans. Anja hefur verið ein öflugasta knattspyrnukona Þýskalands síðustu ár en hún lagði skónna á hilluna eftir Evrópumótið í sumar.

Tikk takk, tikk takk.. Þetta fer að hefjast.

Nú ganga liðin út á völl!

Það er gaman að sjá að það eru nokkrir íslendingar í stúkunni og þau láta í sér heyra þegar íslensku leikmennirnir eru kynntir til leiks.

Vel gert!

Fiðrildin eru löngu komin í mallakút.

Liðin hafa lokið sinni upphitun og eru stödd inn í klefa í lokaundirbúningi.

Það er örlítil gola en sól og bongóblíða. Vont að hafa klikkað á sólarvörninni þar sem sólin er beint í augun á okkur í fjölmiðlastúkunni.

Þjóðverjar binda vonir við að Alexandra Popp sé komin í sitt besta form en hún missti af Evrópumótinu í sumar vegna meiðsla.

Hún skoraði síðast fyrir Þýskaland á Ólympíuleikunum og kollegar mínir hér í Wiesbaden vilja meina að hún hafi ekki verið góð með landsliðinu síðan þá. Þau binda vonir við að hún nái sér á strik hér á eftir.

Þýska pressan virðist annars nokkuð stressuð fyrir leiknum og hér talar fólk um að þýska liðið hafi ekki verið sannfærandi að undanförnu. Það sé erfitt því allir elski þjálfarann Steffi Jones sem var dáð sem leikmaður þýska landsliðsins á sínum tíma en hafi ekki náð að standa undir væntingum sem þjálfari.

Það er nokkuð ljóst að Þjóðverjarnir eru góðu vön en við skulum vona að þýska liðið sé eins brothætt og nokkrir fréttamennirnir hér vilja meina.

Tölfræðin er sannarlega ekki með okkar konum í dag. Liðin hafa mæst 14 sinnum og alltaf hafa Þjóðverjar haft betur. Markatalan í leikjunum er 56-3 andstæðingunum í hag en síðasta mark Íslands gegn Þýskalandi kom fyrir 30 árum og 10 leikjum síðan.

Það er ljóst að brekkan verður brött hjá okkar konum en ef þær halda í íslensku gildin og ná upp sínum besta leik er aldrei að vita hvað gerist.

Þýska liðið hefur sýnt ákveðin veikleikamerki á árinu. Steffi er óreyndur þjálfari þó hún hafi verið reynslumikill leikmaður. Hún hefur til dæmis sjálf viðurkennt að hafa gert mistök á Evrópumótinu og virðist ekki búin að ná því allra besta út úr þýska liðinu. Þá eru nokkrir lykilmenn fjarverandi og þó svo að breiddin hjá Þýskalandi sé rosaleg þá hefur það alltaf einhver áhrif þegar lið saknar öflugra leikmanna.

Hjá Þýskalandi eru óvænt tíðindi en Steffi Jones hefur ákveðið að sýna markverðinum Laura Benkarth traustið á kostnað Almuth Schult sem hefur verið aðalmarkvörður þýska liðsins.

Laura hefur staðið sig vel á æfingum og í æfingaleikjum og Steffi vildi gefa henni tækifæri í þungavigtar leik.

Byrjunarliðin eru klár.

Hjá íslenska liðinu er ein breyting: Rakel Hönnudóttir kemur inn í liðið fyrir Öglu Maríu Albertsdóttur. Þá fer íslenska liðið aftur í 3-5-2 leikkerfið sem það notaðist við á Evrópumótinu eftir að hafa spilað 4-3-3 gegn Færeyjum í fyrsta leik undankeppninnar.

Franski dómarinn Stéphanie Frappart mun sjá um dómgæsluna hér á eftir en til aðstoðar verða samlandar hennar, þær Manuela Nicolosi og Solenne Bartnik.

Hin þýska Christina Biehl er fjórði dómari.

Þetta er annar leikur Íslands í undankeppninni en stelpurnar okkar lögðu frænkur sínar frá Færeyjum örugglega í þeim fyrsta. Lokatölur 8-0 á Laugardalsvelli en þær Elín Metta Jensen, Fanndís Friðriksdóttir og Gunnhildur Yrsa Jónsdóttir skoruðu allar tvö mörk og þær Sara Björk Gunnarsdóttir og Berglind Björg Þorvaldsdóttir skoruðu sitthvort.

Þýskaland hefur leikið tvo leiki og unnið sigra í þeim báðum. Fyrst lögðu þær Slóvena 6-0 á heimavelli og síðan Tékka 1-0 á útivelli.

Þjóðverjar hafa tvisvar orðið Heimsmeistarar og unnið átta Evrópumeistaramót og þykja lang sigurstranglegasta lið riðilsins.

Góðan og margblessaðan daginn!

Hér verður hægt að fylgjast með stórleik Íslands og Þýskalands sem flautaður verður á í Wiesbaden kl.14:00 að íslenskum tíma en 16:00 að staðartíma.

Um er að ræða leik í undankeppni Heimsmeistaramótsins. Efsta lið riðilsins fer beint í lokakeppni HM í Frakklandi 2019 en 2. sæti gæti gefið umspilssæti.