Í byrjunarliði Leiknis eru þrír leikmenn sem komu til félagsins í vetur. Hilmar Þór Hilmarsson frá Þrótti Vogum, Ágúst Freyr Hallsson frá HK og Ernir Bjarnason frá Breiðabliki.

Fyrirliðinn Brynjar Hlöðversson er ekki með en hann ku vera á leið til HB í Færeyjum, liðs Heimis Guðjónssonar. Þá er Tómas Óli Garðarsson, besti leikmaður Leiknis, fjarri góðu gamni og skilur eftir sig stórt skarð.

Í byrjunarliði Fjölnis eru þrír leikmenn sem komu í vetur til félagsins. Almarr Ormarsson frá KA, Arnór Breki Ásþórsson frá Aftureldingu og Sigurpáll Melberg frá Fram.

Tveir strákar fæddir 2001 byrja; Valgeir Lunddal og Jóhann Árni. Jóhann01 eins og hann er kallaður skoraði geggjað aukaspyrnumark fyrir U17 landsliðið á dögunum.

Fjölnismenn töpuðu úrslitaleik Reykjavíkurmótsins í fyrra, Valur varð þá meistari. Íslandsmeistararnir komust ekki upp úr riðli sínum þetta árið. Ólafur Páll Snorrason tók við þjálfun Fjölnis í haust en þetta er hans fyrsta starf sem aðalþjálfari. Hann er Fjölnismaður út í gegn og fyrrum leikmaður og aðstoðarþjálfari liðsins.

Leikni hefur vegnað vel í Reykjavíkurmótinu og unnið það tvívegis á síðustu árum. Breiðhyltingar eru í Inkasso-deildinni undir stjórn Kristófers Sigurgeirssonar.

Velkomin með okkur í Egilshöllina þar sem báðir undanúrslitaleikirnir í Reykjavíkurmótinu fara fram í kvöld. Hefjum leik á viðureign Fjölnis og Leiknis, síðan klukkan 21 leika KR og Fylkir. Báðir leikirnir í beinum textalýsingum hjá okkur.