Byrjunarliðin eru komin inn.

Hallgrímur Jónasson og Guðmann Þórisson eru í hjarta varnar KA. Klárlega eitt besta, og líklega besta, miðvarðapar Pepsi-deildarinnar. Hallgrímur kom heim úr atvinnumennsku fyrir tímabilið og var eftirsóttur. 32 ára miðvörður sem á sextán landsleiki.

Grindvíkingar hafa gríðarlega vel samstillt lið. Óli Stefán Flóventsson hefur verið að gera magnaða hluti og leikmenn þekkja hvorn annan út og inn.

Grindvíkingar hafa meðal annars lagt FH og Fylki í Lengjubikarnum þetta tímabilið. Einu töpuðu stig þeirra voru gegn Þór, þar sem liðin léku í Akraneshöllinni í febrúar og endaði sá leikur 0-0.

Það hefur verið góður bragur á KA en liðið vann fjóra af fimm leikjum sínum í riðlakeppni Lengjubikarsins. Í "ótímabæru spánni" í útvarpsþættinum Fótbolti.net síðasta laugardag var KA spáð öðru sæti Pepsi-deildarinnar en Grindavík því sjötta.

Þóroddur Hjaltalín dæmir leikinn í dag. Aðstoðardómarar eru Ásgeir Þór Ásgeirsson og Eðvarð Eðvarðsson.

KA og Grindavík mætast í undanúrslitum Lengjubikars karla í Boganum á Akureyri klukkan 14. Bæði lið hafa litið afar vel út á undirbúningstímabilinu.

Sigurvegari leiksins mætir Val í úrslitaleiknum 5. apríl en Valsmenn unnu sannfærandi sigur á Stjörnunni í hinum undanúrslitaleiknum í síðustu viku.

Leikurinn verður sýndur beint á Stöð 2 Sport og er textalýsingin unnin úr þeirri útsendingu.