Þjóðsöngvarnir að baki. Ég fæ þann heiður að sitja við hliðina á lýsanda slóvenska sjónvarpsins. Ef ég verð ekki búinn að læra tungumálið þegar leik er lokið verð ég mjög dapur. Nóg af lausum sætum, myndi giska á að áhorfendur væru í kringum 500.

Stelpurnar hafa lokið upphitun, fara nú inn í klefa og fá loka-pepporðin frá Frey Alexanderssyni. Það er vonandi að okkar lið skelli sér í toppsæti riðilsins í dag! Þangað fara stelpurnar með sigri.

Þess má geta að stelpurnar leika ekki í nýju landsliðstreyjunni. Lög gera ráð fyrir að lið leiki í sömu treyjum út alla keppnina og því verður einhver bið á því að kvennalandsliðið fái að klæðast nýju treyjunni.

Í kvennalandsleikjum eru aðeins sjö leikmenn leyfðir á varamannabekknum. Sandra Sigurðardóttir og Sandra María Jessen eru utan hóps í leiknum í dag.

Freyr stillir upp í leikkerfið 3-5-2 þar sem Selma Sól Magnúsdóttir, leikmaður Breiðabliks, leikur sinn fyrsta alvöru mótsleik. Selma er í hægri vængbakverði.

Selma á fjóra landsleiki, einn vináttulandsleik og þrjá frá Algarve æfingamótinu.

Rakel Hönnudóttir leikur sem sóknarmiðjumaður og Agla María Albertsdóttir og Fanndís Friðriksdóttir eru í fremstu víglínu.

Fínasta veður hér í Lendava. Fá ský á himni og sólin skín. Létt gjóla. Plötusnúður vallarins er í stuði og stillir tónlistina í botn. Ási Haralds búinn að raða upp keilum á vellinum og allt að verða klárt fyrir upphitun. Klara Bjartmarz mætt.

Slóvenska kvennalandsliðið hefur orðið fyrir áfalli í aðdraganda leiksins. Mateja Zver, einn öflugasti leikmaður liðsins, á við meiðsli að stríða og er óleikfær gegn stelpunum okkar.

Zver er þekkt meðal íslensks fótboltaáhugafólks enda lék hún með Þór/KA 2008-2011 og aftur 2013.

Besti leikmaður slóvenska liðsins í dag er Lara Prasnikar, sóknarleikmaður hjá Potsdam í Þýskalandi.

.@AsiHaralz spáir leiknum gegn Slóveníu ekki 6-0. #fotboltinet pic.twitter.com/lCAe9clCQZ

— Fotbolti.net (@Fotboltinet) April 5, 2018

Slóvenía - Ísland. @sifatla ætlar að komast nær HM-draumnum. #fotboltinet pic.twitter.com/rJtWGpfJLy

— Fotbolti.net (@Fotboltinet) April 5, 2018

Færasti kvendómari Englands verður að störfum á leiknum. Sian Massey er sérhæfður aðstoðardómari og starfar sem slíkur í ensku úrvalsdeildinni (karla).

Hún verður aðstoðardómari 1 í leiknum í dag, dómari verður Amy Fearn sem varð 2010 fyrsti kvenkyns dómarinn til að starfa sem aðaldómari í deildakeppni karla á Englandi.

Leikvangurinn, Sportni Park Lendava, tekur um 2.000 manns í sæti en starfsmaður slóvenska knattspyrnusambandsins sagði við Fótbolta.net í gær að hann vonaðist eftir um þúsund áhorfendum.

Lið ND Lendava 1903 spilar á vellinum en félagið var endurstofnað 2012 eftir að hafa orðið gjaldþrota fyrr á því ár. Liðið leikur nú í slóvensku B-deildinni og er í þriðja sæti eftir að hafa komið upp úr C-deildinni í fyrra.

Þá er leikvangurinn notaður fyrir kvennalandslið Slóveníu og yngri landslið karla.

Vallaraðstæður virtust þokkalegar þegar útsendarar Fótbolti.net skoðuðu völlinn í gær en markteigarnir beggja megin mættu þó vera betri.

Margrét Lára Viðarsdóttir, Sandra María Jessen, Dagný Brynjarsdóttir og Harpa Þorsteinsdóttir skoruðu mörkin þegar Ísland vann 6-0 gegn Slóveníu á þessum velli 2015. Þær tvær síðarnefndu voru með tvö mörk hvor.

Margrét og Dagný eru báðar fjarverandi í núverandi hóp vegna óléttu en Harpa Þorsteinsdóttir er hinsvegar nýkomin aftur í hópinn eftir að hafa eignast barn.

Ísland á að vinna - Ísland verður að vinna
Íslenska liðið er með spilin á sinni hendi í riðlinum í baráttunni um að komast á HM 2019 í Frakklandi. Liðið á tvo leiki í þessari landsleikjatörn og þeir eru gegn tveimur slökustu liðum riðilsins, leikið verður gegn Færeyjum á þriðjudaginn. Það verða að vinnast til að halda í HM-drauminn.

Lendava heilsar! Ekki nafli alheimsins en héðan eiga stelpurnar okkar góðar minningar frá því að þær unnu 6-0 sigur gegn Slóveníu 2015. Í dag mætast liðin aftur, í undankeppninni fyrir HM 2019. Flautað verður til leiks klukkan 15:00 að íslenskum tíma, 17 að staðartíma. Við segjum frá öllu sem máli skiptir.

Lendava er rétt fyrir innan slóvensku landamærin en íslenski hópurinn hefur dvalist í góðu yfirlæti hinumegin við landamærin, í Króatíuhlutanum. Allir leikmenn hópsins eiga að vera klárir í slaginn samkvæmt okkar upplýsingum.