Það er góður andi yfir Safamýrinni og Framarar að nýta félagsaðstöðu sína til hins ítrasta. Fólk er að gæða sér á grilluðum borgurum meðan leikmenn eru að hita upp.

Mitt mat er að Fram eigi að spila alla heimaleiki sína hérna, mun skemmtilegri andi sem skapast en á Laugardalsvellinum þar sem áhorfendur týnast og félagsstemningin er lítil.

Vel tekið á móti öllum hér enda er Valtýr Björn formaður móttökunefndar!

Kristófer Sigurgeirsson gerir fimm breytingar á sínu byrjunarliði frá tapleiknum gegn Njarðvík!

Trausti Sigurbjörnsson kemur í markið í staðinn fyrir Eyjólf Tómasson fyrirliða sem tekur út leikbann eftir rautt spjald gegn Njarðvík.

Ósvald Jarl Traustason, Sævar Atli Magnússon, Anton Freyr Ársælsson og Vuk Oskar Dimitrijevic koma allir inn í byrjunarliðið. Út fara Hilmar Þór Hilmarsson, Óttar Húni Magnússon, Ingvar Ásbjörn Ingvarsson og Ágúst Freyr Hallsson.

Pedro þjálfari Framara teflir fram óbreyttu liði frá sigurleiknum gegn Þrótti. Enda engin ástæða til breytinga!

Byrjunarliðin hafa verið opinberuð en athygli vekur að Tómas Óli Garðarsson er meðal varamanna hjá Leikni.

Fyrir tímabilið bárust þær fréttir að Tómas væri kominn í hlé frá fótbolta. Tómas Óli var funheitur seinni hluta síðasta tímabils og mikil gleðitíðindi fyrir Breiðhyltinga að hann sé mættur aftur og ætli að taka slaginn með liðinu í sumar.

Leiknismenn töpuðu fyrstu tveimur leikjum sínum í deildinni en bættu við leikmannahóp sinn rétt fyrir gluggalok. Fjölnismaðurinn Anton Ársælsson kom á láni og þá kom búlgarskur miðvörður, Miroslav Pushkarov. Miroslav mun þó ekki taka þátt í leiknum í kvöld en hann tók með sér leikbann frá Búlgaríu. Auk þeirra er Daði Bærings snúinn aftur úr námi í Bandaríkjunum.

Framarar hafa byrjað tímabilið nokkuð vel. Eru með fjögur stig eftir tvær fyrstu umferðirnar. Liðið vann 3-1 útisigur gegn Þrótti í síðustu umferð þar sem fyrirliðinn Guðmundur Magnússon var hrikalega öflugur og skoraði tvö mörk. Tiago Fernandes skoraði hitt mark Framara.

Velkomin með okkur í Safamýrina þar sem Fram og Leiknir eigast við í Inkasso-deildinni, þriðju umferð, klukkan 19:15. Það er mikið stuð framundan í kvöld, fullt af föstudagsleikjum í íslenska boltanum, bæði í Inkasso og Pepsi.