Liðin eru að ganga út á völlinn. Ef ég vissi ekki betur myndi ég halda að við værum að mæta Manchester City. Þökkum fyrir að svo sé ekki.

Þjóðsöngur Íslands spilaður, lítur út fyrir að stelpurnar séu meira en tilbúnar í verkefnið. Ég er orðin spennt!
Tólfan er mætt! Allt einsog það á að vera!
Djöfulsins veisla!

Ég er kominn heim er spilað og fólk tekur vel undir! Geggjað

Ætla að minna aftur á hvað þessi leikur er mikilvægur og afhverju fólk ætti að standa upp og drífa sig á leikinn!
Það eru aðeins 3 leikir eftir í riðlinum.

Ef við vinnum þennan leik hrifsum við toppsætið af ekki minni mönnum en Þýskalandi og getum búið til úrslitaleik 1.september um sæti á Saga Class á Heimsmeistaramótið í Frakklandi næsta sumar. Það væri nú ansi huggulegt að fá úrslitaleik á móti þýsku vélunum hér í rjómablíðu og flóðljósum, margt verra.

Það er geggjuð stemming hérna á vellinum, hálft Benedorm veður og Birgitta Haukdal ómar um allt svæðið! Gæti lífið verið betra?

Hérna fyrir utan eru hoppukastalar, verið að grilla hitt og þetta fyrir mannskapinn og fólk byrjað að týnast upp í stúku.

Jæja SJÁUMST Á LEIKNUM EFTIR HÁLFTÍMA !

Fyrir áhugamenn um slóvenska leikmenn sem hafa spilað í Pepsideild kvenna má geta þess að Mateja Zver er fyrirliði gestanna í dag og leiðir sóknarlínu þeirra.
En hún spilaði fyrir Þór/KA við góðan orðstír frá 2008-2013 og raðaði inn mörkum fyrir þær. Vonandi fyrir okkur skoraði hún bara nóg þá.

Á bekknum hjá okkur höfum við nokkrar sem geta skorað mörk og vel það!

Berglind Björg er sem stendur markahæst í sumar með 7 mörk og svo eru þær Elín Metta og Sandra María með 5. Svava Rós er einnig á bekknum en hún hefur verið að spila í Noregi.
Svo höfum við tvær grjótharðar í þeim Sísí og Önnu Björk ef þannig liggur á okkur.

Ekki amalegt það!

Við eigum fyrir fram að vera sterkara liðið í dag og stjórna þessum leik. Freyr hefur ákveðið að stilla upp fjögra manna vörn.

Hann hefur á móti sterkari þjóðum stillt upp 5 manna vörn þegar við verjumst með þær Sif, Glódísi og Ingibjörgu fyrir miðri vörn og notast við vængbakverði.

En ætlar einsog áður segir í fjóra í dag. Fjögra manna vörnin okkar í dag er skipuð Hallberu, Sif,Glódísi og Ingibjörgu.

Þá fær Ingibjörg það hlutverk að hoppa yfir í hægri bakvörð.

Byrjunarliðin eru komin inn!

Selma Sól úr Breiðablik kemur inn á miðjuna fyrir Söru Björk. Hún verður á miðjunni ásamt Gunnhildi Yrsu.
Hún á að baki 5 A landsleiki og verður gaman að sjá hana fá tækifæri í byrjunarliðinu í dag.

Rakel Hönnu er orðin leikfær og verður i framlínunni. Hún hefur hoppað inn í flestar stöður í landsliðinu, þá meðal annars hægri bakvörðinn og miðjuna. Hún hefur verið að spila frammi með liði sínu Lb07 í Svíþjóð og fær hún að spreyta sig frammi í dag.

Agla María sem hefur verið sjóðheit að leggja upp og skora með Breiðablik í sumar fær sæti í liðinu.

Þó það sé huggulegt að sitja heima og lesa þessa textalýsingu þá mæli ég eindregið með því að fólk fjölmenni á völlinn og öskri stelpurnar til sigurs! Þær þurfa sigur í kvöld.

Við þurfum að vinna þennan leik í kvöld til að gera leikinn við Þýskaland 1.september að RISA LEIK um efsta sæti riðilsins og á HM!

Það skiptir því gríðarlega miklu máli að klára leikinn í kvöld.Fyrirfram mætti búast við sigri íslenska liðsins en það er erfitt að brjóta þær slóvensku niður einsog sást úti. Það verður einnig forvitnilegt að sjá hvernig Freyr stillir upp liðinu í kvöld en við erum án fyrirliðans okkar Söru Bjarkar. Það hefur ekki gerst oft.

Sara og Dagný sem hafa verið lykilmenn í liðinu eru ekki með í kvöld. Dagný er ólétt og Sara meiddist á hásin í úrslitaleik Meistaradeildarinnar með liði sínu Wolfsburg.

Þetta eru tvær af betri fótboltakonum sem við höfum átt og miklir leiðtogar svo jú það væri huggulegt að hafa þær með en við eigum samt sem áður að geta stillt um ógnarsterku liði.

Guðbjörg Gunnarsdóttir er fyrirliði liðsins í fjarveru Söru Bjarkar.

Fyrri leikur liðanna út í Slóveníu fór 0-2 fyrir Íslandi og það voru Gunnhildur Yrsa og Rakel Hönnudóttir sem skoruðu mörkin fyrir okkur.

Góðan kvöldið og verið velkomin í beina textalýsingu frá Laugardalsvelli.

Á slaginu 18:00 fer fram leikur í undankeppni HM 2019 hjá stelpunum okkar.
Heimsmeistaramótið verður spilað á næsta ári í Frakklandi.

Í kvöld er ÍSLAND-SLÓVENÍA og skiptir sigur öllu máli fyrir okkur í kvöld til að geta barist við Þýskaland um efsta sætið í riðlinum

Staðan í riðlinum lítur svona út:
1)Þýskaland 15 stig
2)Ísland 13 stig
3)Tékkland 7 stig
4)Slóvenía 6 stig
5)Færeyjar 0 stig.

Ísland hefur spilað 5 leiki og getur, samkvæmt mínum útreikningum, með sigri í kvöld komist upp fyrir Þýskaland(15 stig, 6 leikir) á toppinn með 16 stig!

Slóvenía situr í fjórða sæti riðilsins með 6 stig. Þær koma beint til Íslands úr góðri Færeyjarferð en slátruðu þær Færeyjum með fjórum mörkum gegn engu.
Ísland vann einmitt Færeyjar í apríl 5-0.

Ísland á núna eftir að spila 3 leiki í þessum undanriðli. Í kvöld við Slóveníu og svo Þýskaland og Tékkland, fyrsta og fjórða september.