Heil og sæl! Hér verður bein textalýsing frá Leiknisvelli þar sem Leiknir og ÍR eigast við í lokaumferð 1. deildarinnar. Grannaslagur framundan.

Leiknismenn eru að berjast fyrir lífi sínu í deildinni en ÍR-ingar eru þegar fallnir niður í 2. deild.

Leiknismenn eru í bílstjórasætinu fyrir leikinn, eru í öruggu sæti með 22 stig. Höttur er með 21 stig og heimsækir topplið Þórs Akureyri en eftir leikinn munu Þórsarar fá bikarinn fyrir sigur í deildinni.

Leiknismenn eru alveg öruggir með sigri í dag. Ef þeir gera jafntefli eða tapa þurfa þeir að treysta á að Höttur vinni ekki Þór.

Höttur heldur sér ef liðið vinnur Þór og Leiknir vinnur ekki ÍR. Ólíklegt er að jafntefli geti bjargað Hattarmönnum nema Leiknir tapi stórt fyrir ÍR.

ÍR-ingarnir hafa tapað tíu leikjum í röð en síðasti sigurleikur þeirra var gegn Leikni í fyrri umferðinni.

Leiknismenn hafa unnið síðustu tvo leiki sína síðan Willum Þór Þórsson var rekinn og Gunnar Einarsson gerður að spilandi þjálfara. Liðið er án síns markahæsta leikmanns í dag, Ólafur Hrannar Kristjánsson tekur út leikbann.

Byrjunarliðin eru komin. Trausti Björn og Quashie koma aftur inn í byrjunarlið ÍR eftir leikbönn.

Fremsti dómari landsins, Kristinn Jakobsson, sér um að dæma leikinn. Jóhann Gunnar Guðmundsson og silfurrefurinn Viðar Helgason, tveir af færustu aðstoðardómurum landsins, halda á flöggunum.

Það er kominn ágætis fjöldi af stuðningsmönnum Leiknis á völlinn og sannkölluð fjölskyldustemning ríkir. DJ Þórir er að fara hamförum á græjunum og umgjörðin gæti vart verið betri.