Velkomin í beina textalýsingu frá stórslag KR og Vals í frestuðum leik úr 10. umferð Pepsi-deildar karla.

KR-ingar sitja á toppi deildarinnar eftir frækilegan 3-1 sigur á FH á þessum velli á dögunum. Auk þess eiga þeir tvo leiki inni og margir vilja meina að titillinn sé tryggður.

Valsarar, aftur á móti, eru í 5. sæti og eru líklegast búnir að missa af Evrópusæti. Þeir eru fjórum stigum frá Blikum sem eru í sætinu fyrir ofan þá en Blikar eiga leik inni eftir leik sinn gegn Stjörnunni sem fer fram á sama tíma.

Hannes er kominn aftur í mark KR-inga þrátt fyrir að Rúnar Alex hafi verið besti leikmaður síðustu umferðar eins og búist var við. Bjarni Guðjónsson er á bekknum en hann meiddist í FH-leiknum. Emil Atlason er einnig tekinn út úr byrjunarliðinu en í þeirra stað koma Atli Sigurjónsson og Brynjar Björn Gunnarsson.

Einnig eru gerðar þrjár breytingar á liði Vals en þeir gerðu sjötta jafnteflið sitt á heimavelli gegn Þórsurum á sunnudaginn. Lucas Ohlander, Daniel Craig Racchi og Iain Williamson detta út fyrir Hauk Pál Sigurðsson, Indriða Áka Þorláksson og Andra Fannar Stefánsson.

KR-ingar hafa ekki unnið Valsara á KR-velli síðan árið 2005. Baldur Sigurðsson sagði í viðtali við Fótbolta.net í dag að KR-ingar væru staðráðnir í að brjóta þann vegg í kvöld.

KR-ingar koma nú út á völlinn að hefja upphitun.

Ásgeir Þór og Fjalar, markverðir Valsara eru þeir einu þaðan sem eru byrjaðir að hita.

Þá mæta Valsarar út á völl að hita upp. Andri Sigurðsson, strákur úr 2.flokki, er í hóp í fyrsta skipti í kvöld. Hann fær áttuna frá Rúnari Má Sigurjónssyni.

Goðsögnin Bjarni Felixson er mættur í blaðamannastúkuna, hann lýsir leiknum í KR-útvarpinu á eftir.

Garðar Örn Hinriksson er í stuði, hann veifaði upp í blaðamannastúkuna á meðan upphitun hans stóð. Hann á það til að vera áberandi í leikjum sem þessum.

Sjáum til hversu mikil áhrif hans verða á úrslit leiksins í kvöld.

Bæði liðin eru í reit núna. Valsarar eru fimm gegn fimm en KR-ingar eru hins vegar með tvö fjögurra manna lið og tvo sem eru alltaf með sóknarliðinu. Það gera ekki allir hlutina eins.

Það er að týnast í stúkuna núna. Búist er við góðri mætingu í kvöld eins og venjan er þegar þessi lið mætast.

Siggi Helga er að sjálfsögðu mættur með KR-húfu á höfði.

Þá halda liðin til búningsherbergja. Rúmlega 10 mínútur í leik.

Það verður að segjast að það er voðalega tómlegt Valsmegin í stúkunni.

Þá halda liðin út á völlinn leidd af Garðari Erni Hinrikssyni, dómara í dag. Heyr mína bæn hljómar hátt og snjallt.