Baldvin Borgars spáir í leikinn KFA 2 - 2 KFG (KFA áfram í vító)
Hér fáum við sterkan 2. deildar slag þar sem bæði lið upplifðu vonbrigði eftir toppbaráttu megnið af sumrinu, KFG gaf svosem mun fyrr eftir og það vissu allir að það myndi gerast, en KFA tapar sinni frábæru stöðu algjörlega niður í lok móts og vonbrigðin endanlega kláruð í lokaumferðinni fyrir viku.

KFG menn byrja leikinn betur enda erfitt fyrir Austfirðinga að rífa sig upp úr þeim andlega dal sem þeir eru í eftir síðustu helgi, Kári Péturs fær boltann og leikur sér að 2-3 KFA mönnum áður en hann leggur boltann á Jolla sem skorar af miklu öryggi mjög snemma í leiknum og KFA menn slegnir. Um miðjan fyrri hálfleik leika Garðbæingar listir sínar aftur með frábærum spilkafla að hætti Bjössa og Kristjáns Guardiola, liðið tekur einhverjar 45 sendingar sín á milli þar sem allir leikmenn KFG snerta boltann nema Tómas Orri, enda hans hlutverk bara að djöflast, berjast og garga inná vellinum auk þess að vera með stæla og leiðindi, illa góður í því. Þetta glæsilega mark endar með stungusendingu frá Kára Péturs á Dag Gadda Jóson sem klárar feykivel og Garðbæingar fara með 2-0 forystu inn í hálfleikinn.

Titlaóði Grikkinn, Mike tekur algjöran trylling á sína menn í hálfleik, gerir fimmfalda skiptingu og segir að hann hefði gert 11 breytingar ef hann gæti það, en bað þessa 6 sem áfram fá að spila leikinn til þess að drulla sér í gang annars taki hann menn útaf og setji enga inná í staðinn. Unnar Ari tekur undir orð þjálfarans og kveikir aðeins í mönnum.

The comeback is on - Unnar Ari stangar boltann inn snemma í seinni eftir hornspyrnu og KFA menn með öll völd á vellinum, þrumuræða Mike að skila sér. Áfram halda heimamenn að þjarma að gestunum sem eru öflugir í að verjast með Tómas Orra fremstan í flokki.

Marteinn Már fer mjög illa með Tómas á ca 75 mínútu, klobbar hann tvisvar og Tómas sparkar Martein niður, gult spjald og aukapyrna á hættulegum stað, Marteinn gerir smá grín í Tómasi fyrir að hafa pakkað honum saman og Tómas missir hausinn, hrindir Marteini og segir nokkur vel valin orð, seinna gula og Tómas sendur í sturtu, KFG manni færri síðasta korterið og marki yfir.

Ekkert verður úr aukaspyrnunni en KFA menn herða tökin enn frekar enda manni fleiri, það er svo á 85 mín sem að Danilo Milenkovic mætir á fjær eftir góðan sprett frá Marteini úti vinstra megin, Marteinn leggur hann í utanáhlaupið frá Geir sem neglir boltanum þvert fyrir markið beint á Danilo sem jafnar leikinn.

Síðustu mínútur venjulegs leiktíma liggja heimamenn á gestunum sem verjast vel og ná ekki að koma inn sigurmarki svo það þarf að framlengja. Í framlengingu er sagan sú sama, gestirnir liggja djúpt og verjast vel í þessum þýska heraga sem Lalli Gumm hefur komið með inn í klúbbinn, KFA menn reyna allt sem þeir geta til að brjóta varnarmúrinn á bak aftur en gengur erfiðlega, eina sem Mike var ánægður með við framlenginguna var að fá inn auka skiptingu svo hann gat gert sjöttu breytinguna sína.

Leikurinn fer alla leið í vító þar sem KFA klárar þetta örugglega enda alvöru Balkanskagataugar í liðinu þar sem vita ekki hvað pressa er, þeir vinna vítóið af miklu öryggi, 4-1 þar sem Nikola ver þrjár spyrnur gestanna og Vice, Danilo, Zvonomir og Geir skora af miklu öryggi úr sínum spyrnum, Geir sýnir Mike að guttinn sé með betri vinstri fót en þjálfarinn og þrumar boltanum upp í samskeytinn og tryggir þar með KFA á Laugardalsvöll og titlavon Mike lifir!

Dómarateymið Gunnar Freyr Róbertsson dæmir leikinn í dag og er með þá Ragnar Arelíus Sveinsson og Antoníus Bjarka Halldórsson sér til aðstoðar á línunum.

Stefnt var að því að spila leik KFA og KFG á Eskivelli en hann hefur nú verið færður inn í Fjarðabyggðarhöllina vegna veðurs.

Úrslitaleikurinn verður svo föstudagskvöldið 29. september á Laugardalsvelli. Hann verður sýndur beint á Stöð 2 Sport.

Spennandi verður að sjá hvaða lið verður fyrsti sigurvegarinn í þessari nýju keppni sem er bikarkeppni neðri deilda.

Fótbolti.net bikarinn
14:00 Víðir-KFK (Nesfisk-völlurinn)
14:00 KFA-KFG (Fjarðabyggðarhöllin)

Undanúrslit í Fjarðabyggð Góðan daginn og verið velkomin í beina textalýsingu frá Fjarðabyggð.

Hér mætast KFA og KFG í undanúrslitum Fótbolti.net bikarsins. Liðið sem vinnur í dag fer í úrslitaleik á Laugardalsvelli og mætir þar sigurvegara úr viðureign Víðis og KFK sem fer fram á sama tíma.