Um tíu mínútur í leik og ég er mættur á völlinn, ákveðin rómantík í því að sitja í bílnum og lýsa leiknum. Mikil landsbyggð í því og minnir mann á ferðir á völlinn út á landi í æsku.

Dómarar
Arnar Ingi Ingvarsson sér um dómgæsluna á Nesfiskvellinum í dag. Honum til aðstoðar eru þeir Guðni Freyr Ingvason og Magnús Garðarsson.

Baldvin Borgars spáir í leikinn Víðir 2 - 3 KFK
Víðismenn eru sterkir á heimavelli en þetta KFK lið sem yfirmaður knattspyrnumála þar, Anton Freyr Geitin Jónsson er búinn að smíða er ógnvænlega gott, enda fóru þeir sanngjarnt upp úr 4. deildinni eins og við var að Búa-st (see what I did here hehe).

Víðismenn byrja sterkt enda KFK menn búnir að vera úti í Búdapest á bender í boði Kidda Páls, eiganda KFK. Tómas Leó kemur Víðismönnum yfir, en eftir ca hálftíma leik verða gestirnir úr Kópavogsdalnum búnir að hrista af sér slenið og komnir í gang, Stefán Ómar skorar eitthvað klassískt mark af harðfylgi og jafnar leikinn, 1-1 í hálfleik.

KFK menn koma sterkir út í seinni eftir þrumuræðu frá Búa, Antoni Geit og Kidda Páls, enda þeir þrír hættulega málmóðir menn sem gera allt til að vinna, ég hef séð Anton svindla í spilum til að vinna tildæmis. Smíðabræður Andri og Binni Jó koma KFK yfir snemma í seinni, annar þeirra leggur upp og hinn skorar en enginn veit hvort gerði hvað svo dómarinn giskar bara hvorn hann skráir markið á, Víðismenn vakna við þetta þar sem Eva Rut, drottningin í Garðinum tekur trylling og urðar yfir sína menn, skipar Svenna þjálfara að setja Atla Kerlon inná og fleira, sem Svenni þorir ekki að gera annað en að hlýða, það snýr við leiknum og Atli Kerlon jafnar leikinn á ca 80 mín með sturluðu einstaklingsframtaki.

Þarna þurfa þjálfari, eigandi og yfirmaður knattspyrnumála hjá KFK að bregðast hratt við enda vita þeir að framlenging muni ekki fara vel í þeirra menn eftir viku í Búdapest þar sem tilgangur ferðarinnar var ekki að æfa með Ferencvaros eða skokka upp Castle Hill. Þannig þeir kalla í Atla Dag, einn eitraðasta vinstri fór landsins og henda honum inná með þau einu skilaboð að klára þennan leik fyrir þá, Atli kemur hins vegar með ömurlega innkomu og á varla heppnaða sendingu, enda tímabilið löngu búið í hausnum á honum, þá stígur Sigurður Orri óvæntur upp, tekur rosalegt hlaup upp hægri vængbakvörðinn, klobbar tvo að hætti Luigi og hamrar boltann í netið á 90+3 og allt tryllist, Eva Rut tekur akademískt brjálæðiskast á hliðarlínunni enda hefði þessi titill bjargað vonbrigðartímabili Víðismanna sem horfðu upp á Sandgerðinga sækja titil fyrir nokkrum dögum og fara upp svo nú er blái hluti Suðurnesjabæjar ekki með montréttinn, KFK siglif hinsvegar áfram í úrslitaleikinn og Kiddi Páls hringir beint í Kölska til að dressa liðið upp fyrir mætingu á Laugardalsvöll.

Víðir Fjórða sæti í 3.deild varð hlutskipti Víðis í deildarkeppninni þetta árið. Liðið átti þar möguleika á sæti í 2.deild að ári en vont tap gegn fallliði Ýmis í 20.umferð gerði endanlega úti um möguleika Víðis á sæti í 2.deild að ári.

Það er þó gulrót fyrir Víðismenn að eiga möguleika á að lyfta bikar á Laugardalsvelli eftir rúma viku en þeir eru skrefi nær þeim möguleika með sigri í dag. Í fyrstu umferð keppninnar sat liðið hjá ok kom því til leiks í 16 liða úrslitum. Þar fékk Víðir lið Hvíta Riddarans í heimsókn og hafði 5-1 sigur. Í 8 liða úrslitum fékk liðið svo Völsung í heimsókn á Nesfiskvöllinn og vann þar nokkuð þægilegan 2-0 sigur.

Líkt og hjá liði KFK er mikil reynsla í leikmannahópi Víðis og þó nokkrir leikmenn með einhverja tugi leikja í efstu deild. Ari Steinn og Helgi Þór Jónsson eiga einhverja tugi leikja í efstu deild á milli sín með Keflavík, sömuleiðis hefur Aron Freyr Róbertsson talverða reynslu úr efstu deild sem og Nemanja Latinovic.

KFK
Lið KFK undir stjórn Búa Vilhjálms Guðjónssonar hefur átt eftirminnilegt sumar þetta árið. Liðið tryggði sér sæti í 3.deild á dögnum þegar liðið endaði í 2.sæti fjórðu deildar og tryggði sig þar með upp.

Bikarsagan í Fótbolta.net bikarnum hefur svo verið gjöful fyrir félagið til þessa. Í fyrstu umferð lagði KFK Árbæ í frábærum leik 6-3. Næstu fórnarlömb KFK manna var lið Ýmis en lokatölur þar urðu 2-1 KFK í vil sem náði þar að hefna fyrir ósigur gegn Ými í úrslitakeppni 4.deildar í fyrra. Í átta liða úrslitum var svo komið að liði Kára að lúta í gras gegn KFK, aftur fengum við hörkuleik og lokatölur 3-2 KFK í vil og sæti í undanúrslitum tryggt.

Þegar rennt er yfir leikmannahóp KFK eru nokkur ansi kunnuleg nöfn þar að finna. Nöfn eins og Andy Pew, Farid Zato og bræðurnir Andri og Brynjar Jónassynir eru nöfn sem margir knattspyrnuáhugamenn kannast við. Þá er ekki verra að vera með Andra Þór Grétarsson í markinu en hann lék síðast með Kórdrengjum vorið 2021 uns hann meiddist illa í bikarleik gegn ÍBV. Það er því alveg ljóst að lið KFK er firnasterkt og reynslumikið og til alls líklegt í Fótbolta.net bikarnum.

Næsta stopp Laugardalsvöllur Eftir langt og strangt sumar fer að líða að lokum í Fótbolta.net bikarnum og eru liðin skrefi nær stóra takmarkinu að verða fyrsta liðið til að lyfta Fótbolta.net bikarnum. Sigurliðið fer í úrslit sem leikin verða næstkomandi föstudag undir flóðljósum á Laugardalsvelli og mætir þar sigurliðinu úr viðureign KFA og KFG sem leika í Fjarðabyggðarhöllinni nú á sama tíma.

Undanúrslit Fótbolti.net bikarsins! Heil og sæl kæru lesendur og verið hjartanlega velkomin í þessa beinu textalýsingu Fótbolta.net frá undanúrslita leik Víðis og KFK í Fótbolta.net bikarnum en flautað verður til leiks á Nesfisk vellinum í Garði á slaginu 14:00.