Freyr Alexandersson.
Freyr Alexandersson, landsliðsþjálfari og fyrrum þjálfari Leiknis, mætti í útvarpsþáttinn Fótbolti.net og fór yfir fyrstu umferð Pepsi-deildarinnar með Tómasi Þór Þórðarsyni og Elvari Geir Magnússyni.
Hlustaðu á umræðuna í spilaranum hér að ofan.
Hlustaðu á umræðuna í spilaranum hér að ofan.
Þróttur - FH (í dag 16)
„FH liðið er ekki sátt með sína frammistöðu gegn Val. FH tapar ekki tveimur leikjum í röð og þeir mæta dýrvitlausir í þennan leik. Þetta verður samt jafn leikur, Þróttarar vita alveg hvað FH-ingar eru að fara að gera og hanga í þessu. FH vinnur þetta samt með einu marki."
ÍBV - ÍA (í dag 17)
„Bæði lið geta fallið í sumar. Ég dáist að því hversu hugrakkur Gulli (Gunnlaugur Jónsson) er að veðja á þessa ungu stráka. Þetta er samt hættulegt. Mögulega verður þetta gríðarlega góð ákvörðun því aldrei verða eins mörg augu á Pepsi-deildinni erlendis frá og í ár. Búðarglugginn er pússaður og risastór. ÍBV er stærsta spurningamerkið ásamt Fjölni. Eyjamenn byrjuðu með trukki en svo hefur þetta verið á niðurleið. Ég tel að þessi leikur skipti gríðarlegu máli en endi með jafntefli því hvorugt liðið vill tapa."
Breiðablik - Víkingur Ó. (í kvöld 19:15)
„Blikar hafa átt í vandræðum með að skora mörk og Arnar Grétarsson verður uppi í stúku og það hefur áhrif í fyrsta leik. Þetta verður gríðarlega lokaður leikur. Ólsararnir eru með góða framherja og það verður einstaklingsframtak eða fast leikatriði sem ræður úrslitum. Ég spái því að Ólafsvík vinni Breiðablik."
Valur - Fjölnir (í kvöld 20)
„Ég held að við séum að fá rosalega skemmtilegt Valslið í sumar. Valur hefur leikmenn í að spila sóknarfótbolta og Óli Jó hefur alltaf spilað sóknarfótbolta. Fjölnisliðið er algjört spurningamerki. Gústi (Ágúst Gylfason) hefur gert stórkostlega hluti hjá Fjölni og skapað rosalega liðsheild. Nú eru þeir að gera allt aðra hluti og það verður spennandi að sjá hann kljást við þetta. Fyrsti leikur á Hlíðarenda á þessu gervigrasi og Valur vinnur þennan leik 2-0."
Stjarnan - Fylkir (á morgun 19:15)
„Fylkir er að spila skemmtilegan fótbolta. Ég sem þjálfari er mjög spenntur að sjá þróun liðsins en ég held að Hemmi (Hermann Hreiðarsson) geri einhverja leikmenn miklu betri, hann er bara þannig týpa. Albert Brynjar Ingason hefur verið meiddur og Hermann Hreiðarsson er í banni. Garðar Jóhannsson er spilandi aðstoðarþjálfari. Hver stýrir Fylki af bekknum í fyrsta leik, verður það Garðar? Þeir þurfa að spila Garðari ef Albert er ekki klár. Hvert er sterkasta lið Stjörnunnar? Ég hlakka mest til að sjá skýrsluna úr þessum leik og hverjir byrja hjá Stjörnunni. Við fáum Stjörnusigur í þessum leik, 1-0 ætla ég að giska á."
KR - Víkingur R. (á morgun 19:15)
„Lengjubikarúrslitaleikurinn gefur ekki rétta mynd af þessu. KR-ingarnir eru hrikalega sterkir til baka. Indriði og Skúli eru svo miklir töffarar og með svo mikla reynslu, þeir eru alveg ískaldir og unaður að fylgjast með þeim. Víkingar eru með ógnarhraða fram á við og ég hlakka mikið til að sjá Viktor Jónsson, mér finnst hann æðislegur leikmaður. Ég er spenntur að sjá hvernig þessi leikur verður taktískt. Ég segi jafntefli 1-1."
Sjá einnig:
Hlustaðu á útvarpsþáttinn í heild sinni
Athugasemdir
