Víkingur Ólafsvík tryggði sér verðskuldað sæti í Pepsi-deildinni með sannkölluðum stórsigri gegn Grindavík í 1. deildinni í kvöld. Eftir að hafa lent undir snemma leiks unnu Ólafsvíkingar sannfærandi fimm marka sigur og tryggðu sér toppsæti 1. deildarinnar og þátttökurétt í Pepsi-deildinni að ári.

Óli Baldur Bjarnason kom heimamönnum í Grindavík yfir strax á 7. mínútu en fyrir leikhlé var staðan orðin 4-1 Ólsurum í vil.

Hrvoje Tokic bætti svo við tveimur mörkum í seinni hálfleik og skoraði hann alls fjögur áður en William Dominguez da Silva rak síðasta naglann í kistu Grindvíkinga.

Alex Freyr Hilmarsson minnkaði muninn fyrir heimamenn þegar fimm mínútur voru eftir af leiknum en mark hans breytti litlu. 7-2 sigur Víkings staðreynd og liðið snýr aftur í Pepsi-deildina eftir tveggja ára fjarveru.

Möguleikar Grindavíkur á sæti í Pepsi-deildinni hurfu endanlega í kvöld, en veik von hefði lifað með sigri.