Spennan magnast í toppbaráttunni í 2. deild karla í knattspyrnu, en toppliðin þrjú unnu öll sigra í kvöld.

Leiknir Fáskrúðsfirði styrkti stöðu sína á toppnum með góðum 3-1 útisigri gegn Sindra, en þeir Tadas Jocys og Björgvin Stefán Pétursson skoruðu tvö mörk með mínútu millibili í fyrri hálfleik. Ási Þórhallsson minnkaði metin fyrir Sindra, sem lék manni færri allan seinni hálfleikinn, en Paul Bogdan Nicolescu kláraði leikinn endanlega á lokasekúndunum.

ÍR hélt 2. sætinu með naumum heimasigri gegn Njarðvík. Illa gekk að brjóta ísinn en Guðfinnur Þórir Ómarsson tryggði Breiðhyltingum þó mikilvægan sigur þegar rúmar 10 mínútur voru eftir.

Huginn kemur þó í humátt á eftir ÍR og munar enn einungis stigi á liðunum eftir 3-2 útisigur Seyðisfirðinganna gegn KV í kvöld. Það var Ingólfur Árnason sem tryggði gestunum sigur á 83. mínútu.

Þá vann Afturelding 1-0 sigur gegn Ægi þökk sé marki frá Wentzeli Steinarri Kamban. Ægir gæti því dottið í fallsæti að umferð lokinni.