Kolbeini finnst Hollendingar og fjölmiðlar í landinu voðalega lítið vera að tala um íslenska liðið.

„Það er aðallega verið að tala um fyrirliðahlutverkið hjá þeim og hvernig Danny Blind ætlar að breyta. Það er kannski bara fínt að þeir séu ekki of mikið að pæla í okkur. Ég held að það verði ekki mikið af breytingum hjá Blind, hann er svona típískur hollenskur þjálfari."

„Það verður ekki auðvelt fyrir Hollendinga að vinna okkur en við þurfum að eiga algjöran toppleik til að ná góðum úrslitum. Það er gríðarlega mikilvægt að ná allavega stigi hérna og fara svo heim og ná í þrjú stig þar."

Kolbeinn gekk í raðir Nantes í Frakklandi frá Ajax fyrir þetta tímabil Hvernig hafa hans fyrstu kynni af frönsku deildinni verið?

„Þetta er allt annað en Holland, það er meira um varnarleik og beðið eftir þessu eina marki. Það er fínt fyrir mig að koma í nýtt umhverfi og vonandi næ ég að spila heilt tímabil. Það er mikilvægast fyrir mig að ná heilu tímabili í lappirnar og bæta minn leik," segir Kolbeinn en viðtalið má sjá í heild í sjónvarpinu hér að ofan.